რა მოხდა: დღეს, 18 მარტს, საქართველოში ნატოს გენერალური მდივანი იენს სტოლტენბერგი ჩამოვიდა. ის მთავრობის ადმინისტრაციაში საქართველოს პრემიერ-მინისტრს ირაკლი კობახიძეს შეხვდა, სადაც ერთობლივი განცხადებები გააკეთეს.

რაზე ისაუბრა იენს სტოლტენბერგმა:

• სუვერენიტეტი და ტერიტორიული მთლიანობა: სტოლტენბერგმა აღნიშნა, რომ საქართველო არის ერთ-ერთი უახლოესი პარტნიორი ნატოსთვის და ნატო მხარს უჭერს საქართველოს სუვერენიტეტს და ტერიტორიულ მთლიანობას.
• "სამხრეთ ოსეთი და აფხაზეთი არის საქართველოს ნაწილი. ნატო აგრძელებს რუსეთისადმი მოწოდებას, რომ გაიწვიოს საქართველოს ძირძველი ტერიტორიების დამოუკიდებლობის აღიარება. ოკუპირებულ ტერიტორიებზე რუსეთის აქტივობები და უკრაინაში მიმდინარე მოვლენები აბსოლუტურად უკანონოა" — თქვა სტოლტენბერგმა.
• ასევე, ნატოს გენერალურმა მდივანმა აღნიშნა, რომ "აფასებს იმ მნიშვნელოვან წვლილს, რასაც თქვენ ჩვენს მისიებში ახორციელებთ".
• შავი ზღვის უსაფრთხოება: გენერალურმა მდივანმა განაცხადა, რომ შავი ზღვის უსაფრთხოება აქტუალური საკითხია როგორც საქართველოსთვის, ისევე ნატო-სთვის.
• "რუსეთის ნავიგაციის თავისუფლება პრინციპში შეფერხებული არის და ჩვენი მხარდაჭერით ზიანდება რუსეთის დიდი ფლოტი შავ ზღვაზე. უკრაინის წარმატებამ უნდა მოგვცეს საშუალება, რომ ეკონომიკა გაიზარდოს და გლობალური სურსათის მიწოდების ჯაჭვში მოხდეს აღდგენა", — განაცხადა სტოლტენბერგმა.
• სამომავლო გეგმები: სტოლტენბერგმა აღნიშნა, რომ ნატოს პარტნიორობა საქართველოსთან უკვე არის ძლიერი და დღეს საუბარი ჰქონდათ [იენს სტოლტენბერგს და ირაკლი კობახიძეს] იმაზე, თუ როგორ გააძლიერონ პარტნიორობა კიდევ უფრო მეტად.
• "ზოგადად შევთანხმდით, რომ ცალკეული, კონკრეტული პროგრამები გვექნება, საჭიროებებზე მორგებული, იმისათვის, რომ საქართველო და ნატო კიდევ უფრო დაახლოვდეს. მივესალმები იმ წინსვლას, რომელიც კრიზისების მართვის, კიბერუსაფრთხოების და სამხედრო ინჟინერიის მიმართულებით ხორციელდება ქვეყანაში", — განაცხადა ნატოს გენერალურმა მდივანმა.

გარდა ამისა,

• თურქული სამხედრო ფრეგატი ბათუმში: სტოლტენბერგმა აღნიშნა, რომ რამდენიმე დღის წინ თურქული სამხედრო ფრეგატი ეწვია ბათუმის სანაპიროს და შეხვდა ქართველ პარტნიორებს.
• "ესაა იმის მაგალითი, თუ როგორ ვთანამშრომლობთ რეგიონში, ერთმანეთს ვუზიარებთ შესაძლებლობებს და ვუძლიერებთ პოტენციალს. ამით დასტურდება, თუ რამდენად მნიშვნელოვანია ნატოსთვის საქართველო".
• კანდიდატის სტატუსი: სტოლტენბერგის თქმით, კანდიდატის სტატუსი, რომელიც მიენიჭა საქართველოს, "გააძლიერებს კეთილდღეობის მისწრაფებებს და ამ მიმართულებით სულისკვეთებას ქვეყანაში".
• "თანამშრომლობის ეს მიმართულება გრძელდება უფრო ძლიერი, დემოკრატიული მიმართულებების უზრუნველსაყოფად, ინტეგრაციისთვის, მათ შორის, ბუქარესტის გადაწყვეტილება, რომელიც გულისხმობს იმას, რომ საქართველო გახდება ნატოს ალიანსის წევრი სახელმწიფო. კანდიდატის სტატუსი, რომელიც მიენიჭა საქართველოს ევროპული საბჭოს მიერ, გააძლიერებს კეთილდღეობის მისწრაფებებს და ამ მიმართულებით სულისკვეთებას ქვეყანაში, ჩვენ მხარდამხარ ვივლით წინ ნატოს მიმართულებით", — თქვა მან.
• რეფორმები: გენერალურმა მდივანმა აღნიშნა, რომ საქართველოში უნდა გაგრძელდეს ადგილობრივი რეფორმები სამართლის უზენაესობის მიმართულებით, თავისუფალი და ღია საპარლამენტო არჩევნების ჩათვლით.

სტრიქონებს შორის: 14 მარტს, ნატოს გენერალურმა მდივანმა, იენს სტოლტენბერგმა საქართველოს შეახსენა, რომ რეფორმები მნიშვნელოვანია და თქვა, რომ "ახლო მომავალში" ჩამოვა.

ბოლო ხაზი: ნატოს გენერალური მდივანი დღეს საქართველოს პრეზიდენტს, სალომე ზურაბიშვილსაც შეხვდება, ხოლო ხვალ, 19 მარტს, საქართველოდან ერევანში გაემგზავრება, სომხეთის პრეზიდენტსა და პრემიერ-მინისტრთან შესახვედრად.