საქართველოში მცხოვრებ ორ რუს პოლიტიკურ აქტივისტს ქვეყანაში ხელახალი შემოსვლა აეკრძალა, მას შემდეგ, რაც რუსეთის პრეზიდენტის, ვლადიმირ პუტინის ოპონენტის, ბორის ნადეჟდინის კამპანიაში მიიღეს მონაწილეობა.

ორშაბათს, 26 თებერვალს, თბილისში დაფუძნებული რუსული სამოქალაქო საზოგადოებრივი ორგანიზაციის, Frame-ის ხელმძღვანელმა მაქსიმ ივანცოვმა განაცხადა, რომ მას საქართველოში შესვლა აუკრძალეს. ივანცოვმა დამოუკიდებელ რუსულ ტელეარხ დოჟდს უთხრა, რომ საქართველოში ორშაბათს ვილნიუსიდან ჩაფრინდა.

მისი თქმით, საქართველოს სასაზღვრო პოლიცია მას "არასათანადოდ მოექცა" და რუსეთში დეპორტით დაემუქრა.

"მე ოთხ სხვადასხვა პოლიციელს რამდენჯერმე ვესაუბრე იმის შესახებ, რომ მსურდა თავშესაფარი. ერთმა პასტა და ფურცელიც ითხოვა, პეტიციის დასაწერად. იცინოდნენ და 20-ჯერ დამემუქრნენ მოსკოვში დეპორტაციით,"— წერს ის ფეისბუქზე, — "ამბობდნენ, რომ მე რუსეთის და საქართველოს მტერი ვარ".

ივანცოვმა, რომელიც სამი წელი ცხოვრობდა თბილისში, მისი საქართველოდან დეპორტაციას უკავშირებს მისი ორგანიზაციის კამპანიას, რომელიც აგროვებდა ხელმოწერებს ომის მოწინააღმდეგე პოლიტიკოსის, ბორის ნადეჟდინის რუსეთის მომავალ არჩევნებში საპრეზიდენტო კანდიდატად რეგისტრაციისთვის.

ივანცოვი ამტკიცებს, რომ ქართველმა მესაზღვრეებმა უარი უთხრეს ადვოკატთან საუბარზე, ასევე, არ განუმარტეს, რატომ ეუბნებოდნენ უარს საქართველოში შემოსვლაზე.

"მათ მომცეს ფურცელი, სადაც ეწერა, რომ არ შემიშვებდნენ. ვფიქრობდი, რომ დაწერილი იქნებოდა ასეთი შემთხვევების ტრადიციული მიზეზი — "სხვა მიზეზები", თუმცა ეს იქ არ ეწერა", — თქვა მან.

ივანცოვი იმავე დღეს უნგრეთში გაფრინდა. მან თქვა, რომ აპირებს საჩივრის შეტანას აეროპორტში მის მიმართ მოპყრობასა და საქართველოს ხელისუფლების მიერ ქვეყანაში შესვლაზე უარის თქმის შესახებ.

OC Media-მ მიმართა საქართველოს შინაგან საქმეთა სამინისტროს, ივანცოვის დეპორტაციის შესახებ კომენტარისთვის.

კვირას, ეგორ კუროპტევმა, ფონდ "თავისუფალი რუსეთის“ დირექტორმა სამხრეთ კავკასიაში, განაცხადა, რომ ორ აქტივისტს, რომელთაგან ერთი, მოგვიანებით, ივანცოვი აღმოჩნდა, გასულ კვირას ქვეყანაში შესვლა აუკრძალეს.

კუროპტევმა თქვა, რომ ორივე აქტივისტი აწარმოებდა კამპანიას რუსეთში საპრეზიდენტო კანდიდატისთვის ხელმოწერების შეგროვების მიზნით - სავარაუდოდ, ის ნადეჟდინს გულისხმობდა.

ნადეჟდინი, სახელმწიფო სათათბიროს ყოფილი წევრი, უკრაინასთან რუსეთის ომის ღია კრიტიკოსია. მას არჩევნებში მონაწილეობის უფლება არ მისცეს მიზეზით, რომ ვერ შეაგროვა საკმარისი ხელმოწერები მისი კანდიდატურის მხარდასაჭერად.

ამ თემაზე: რუსეთის საპრეზიდენტო არჩევნებში მონაწილეობის უფლებას არ აძლევენ კანდიდატს, რომელიც უკრაინაში ომის წინააღმდეგია

უკრაინაში ომის დაწყების შემდეგ, 2022 წლიდან, პოლიტიკურ რეპრესიებს, ეკონომიკურ პრობლემებსა და ომში გაწვევის შანსს ათასობით რუსი გაექცა.

მას შემდეგ, საქართველომ რამდენიმე რუს აქტივისტს, ჟურნალისტს და პოლიტიკოსს აუკრძალა ქვეყანაში შესვლა.

კუროპტევმა თქვა, რომ გასულ კვირას საქართველოს მიერ ორი აქტივისტის დეპორტაციამ "შეიძლება შეუქმნას უსაფრთხოების პირდაპირი რისკები იმ რუსებს, რომლებიც იძულებულნი გახდნენ, დაეტოვებინათ რუსეთის ტერიტორია, პოლიტიკური დევნის გამო“.

"საქართველოს ხელისუფლების ასეთი ქმედებები, შეიძლება ჩაითვალოს არა მხოლოდ იმ ადამიანების უფლებების დარღვევად, რომლებსაც პოლიტიკური მიზეზების გამო ჩამოერთვათ შესაძლებლობა, დაბრუნებულიყვნენ ქვეყანაში, რომელიც რამდენიმე წელია, მათი ერთადერთი სახლი იყო, არამედ პოლიტიკურ ზეწოლადაც ნებისმიერ ჯგუფზე, რომლებიც არ იზიარებენ კრემლის აგრესიულ პოლიტიკას და რაიმე ქმედებებს ახორციელებენ ამ კუთხით“, — განაცხადა მან.

სტატიაში წარმოდგენილი შეხედულებები ეკუთვნის ავტორს და არ წარმოადგენს On.ge-ის პოზიციას. მასალა ქვეყნდება OC Media-სთან პარტნიორობის ფარგლებში, რომლის შედეგად, გამოცემის სტატიები ამიერიდან ოთხ ენაზე გავრცელდება. საქართველოში OC Media-ს პარტნიორი On.ge-ა. სტატია ინგლისურად შეგიძლიათ წაიკითხოთ აქ.