მოკლედ: ჰააგის სასამართლომ უბრძანა ისრაელს, მიიღოს ყველა ზომა იმისთვის, რომ აღკვეთილი იყოს გენოციდის აქტები ღაზაში, თუმცა ცეცხლის შეწყვეტის შესახებ მოწოდება არ გაუკეთებია.

  • ეს გადაწყვეტილება ეხება მხოლოდ სამხრეთ აფრიკის მოთხოვნას, გადაუდებელი ზომების მიღების შესახებ, რომელიც მოქმედებს როგორც შემაკავებელი ორდერი.
  • გენოციდის საქმის სრულ განხილვას და ვერდიქტს, შესაძლოა, რამდენიმე წელი დასჭირდეს.

სტრიქონებს შორის: სამხრეთ აფრიკამ მართლმსაჯულების საერთაშორისო სასამართლოში (ICJ) სარჩელი იანვრის დასაწყისში შეიტანა და სთხოვა სასამართლოს, მიეღო ზომები ომის შესაჩერებლად, რომელსაც 26 ათასზე მეტი პალესტინელი ემსხვერპლა.

  • ქვეყანამ ისრაელი გენოციდში დაადანაშაულა.

დეტალები: დღეს გამართულ მოსმენაზე, მართლმსაჯულების საერთაშორისო სასამართლომ განაცხადა, რომ ისრაელმა უნდა შეზღუდოს სამხედრო კამპანიით გამოწვეული სიკვდილი და ნგრევა, ასევე, აღკვეთოს და დასაჯოს გენოციდის წაქეზება და უზრუნველყოს ჰუმანიტარული დახმარების გაწევა ღაზისთვის.

  • "კატასტროფული ჰუმანიტარული მდგომარეობა ღაზის სექტორში არის კიდევ უფრო გაუარესების სერიოზული რისკი, სანამ სასამართლო საბოლოო გადაწყვეტილებას გამოიტანს“, — განაცხადა სასამართლოს პრეზიდენტმა, მოსამართლე ჯოან დონოგიუმ.
  • 17-მა მოსამართლემ გამოსცა ექვსი გადაუდებელი ღონისძიების ბრძანება ისრაელისთვის, რათა თავიდან აიცილოს ისეთი ქმედებები, რომლებიც, შეიძლება, ეწინააღმდეგებოდეს გენოციდის კონვენციას.

რა არის სამხრეთ აფრიკის არგუმენტები: 12 იანვარს მოსმენაზე სამხრეთ აფრიკის უმაღლესი სასამართლოს ადვოკატმა, ტემბეკა ნგკუკაიტობიმ თქვა, რომ "სამხედრო აგრესიის გზით" აშკარა იყო ისრაელის განზრახვა გენოციდთან დაკავშირებით.

  • მან თქვა, რომ ისრაელს ჰქონდა გეგმა, გაენადგურებინა ღაზა.

რას პასუხობს ისრაელი: ბრალდებებს კატეგორიულად უარყოფს და ამბობს, რომ სამხრეთ აფრიკის სარჩელი უსაფუძვლოა.

  • მათი მტკიცებით, ისრაელის თავდაცვის ძალები ცდილობს, მინიმუმამდე დაიყვანონ მსხვერპლი ღაზაში.

ბოლო ხაზი: ჰააგის მართლმსაჯულების საერთაშორისო სასამართლო (ICJ) გაეროს მთავარი სამართლებრივი ორგანოა.

  • მიუხედავად იმისა, რომ გადაწყვეტილება იურიდიულად სავალდებულოა, სასამართლოს არ გააჩნია მისი აღსრულების უფლებამოსილება.