მოკლედ: ისრაელმა განაცხადა, რომ სამხრეთ აფრიკამ სიმართლე დაამახინჯა ჰააგის მართლმსაჯულების საერთაშორისო სასამართლოში წარდგენილ საქმეში.

  • სამხრეთ აფრიკა აცხადებს, რომ ისრაელი ღაზაში ომით პალესტინელების გენოციდს ახორციელებს.
  • ის, ასევე, მოუწოდებს ჰააგის სასამართლოს, ისრაელს სამხედრო ოპერაციების შეჩერება მოსთხოვოს.

ჰააგის სასამართლომ, ისრაელის წინააღმდეგ სამხრეთ აფრიკის სარჩელის მოსმენა გუშინ დაიწყო.

სტრიქონებს შორის: ჰააგის მართლმსაჯულების საერთაშორისო სასამართლო (ICJ) გაეროს მთავარი სამართლებრივი ორგანოა.

მიუხედავად იმისა, რომ გადაწყვეტილება იურიდიულად სავალდებულოა, სასამართლოს არ გააჩნია მისი აღსრულების უფლებამოსილება.

  • სამხრეთ აფრიკის საჩივარში წერია, რომ ისრაელი არღვევს 1949 წლის გენოციდის კონვენციას, რომელიც მხარეებს აკისრებს ვალდებულებას, თავიდან აიცილონ გენოციდი.

რას ამბობს ბრალდებებზე ისრაელი

დღეს ჰააგის სასამართლოში სიტყვით გამოსვლისას, ისრაელის საგარეო საქმეთა სამინისტროს მრჩეველმა, ტალ ბეკერმა თქვა, რომ ჰამასი ცდილობს, მაქსიმალური ზიანი მიადგეს როგორც ისრაელის მოსახლეობას, ასევე — პალესტინელებს, იმ ფონზე, რომ ისრაელი ყველაფერს აკეთებს, მინიმუმამდე დაიყვანოს მსხვერპლი მშვიდობიან მოსახლეობას შორის.

  • მისივე თქმით, სამხრეთ აფრიკამ სასამართლოს ფაქტობრივად და სამართლებრივად დამახინჯებული რეალობა წარუდგინა სასამართლოს.
ტალ ბეკერი

ტალ ბეკერი

ფოტო: Reuters

რა არის სამხრეთ აფრიკის არგუმენტები

გუშინ, სასამართლოს 17-მა მოსამართლემ მოუსმინა სამხრეთ აფრიკის უმაღლესი სასამართლოს ადვოკატს, ტემბეკა ნგკუკაიტობის, რომელმაც თქვა, რომ "სამხედრო აგრესიის გზით", აშკარაა ისრაელის განზრახვა, გენოციდთან დაკავშრებით.

  • მისი თქმით, ისრაელს ჰქონდა გეგმა, გაენადგურებინა ღაზა.
ტემბეკა ნგუკაიტობი

ტემბეკა ნგუკაიტობი

ფოტო: კევინ საზერლენდი

ადილა ჰასიმმა, რომელიც ასევე წარმოადგენს სამხრეთ აფრიკას, სასამართლოს განუცხადა, რომ "პალესტინელი ხალხისთვის სიცოცხლის, ქონების, ღირსებისა და გამოუსწორებელი ზარალი ყოველდღიურად იზრდება“.

  • "ტანჯვას ვერაფერი შეაჩერებს, გარდა ამ სასამართლოს ბრძანებისა", — თქვა ჰასიმმა.

მოსმენამდე წარდგენილ მტკიცებულებებში, სამხრეთ აფრიკამ განაცხადა, რომ ისრაელის ქმედებები "მიზნად ისახავს პალესტინის ეროვნული, რასობრივი და ეთნიკური ჯგუფის მნიშვნელოვანი ნაწილის განადგურებას".

ბოლო ხაზი: როდის გამოიტანს სასამართლო გადაწყვეტილებას, უცნობია.

  • პროცესი, შესაძლოა, წლების განმავლობაშიც გაიწელოს.