ესპანეთის ფეხბურთის ფედერაციის პრეზიდენტი ლუის რუბიალესი ცოტა ხნის წინ საერთაშორისო სკანდალში გაეხვა. ქალების მსოფლიო ჩემპიონატის ფინალში ესპანეთის ქალთა ნაკრების გამარჯვების შემდეგ მან ფეხბურთელ ჯენიფერ ერმოსოს ტუჩებში აკოცა, რაც კამერებმა დააფიქსირეს.

ერმოსომ იმავე დღეს განაცხადა, რომ პრეზიდენტმა ნების საწინააღმდეგოდ აკოცა, რაც მისთვის მოულოდნელი და მიუღებელი იყო. რუბიალესმა განაცხადა, რომ შეცდომა დაუშვა, თუმცა ფეხბურთის სამყაროს წარმომადგენლებმა და ესპანელმა პოლიტიკოსებმა, მათ შორის, პრემიერმინისტრმაც, მისი საქციელი დაგმეს და მიიჩნიეს, რომ მისი ბოდიში საკმარისი არ იყო.

ჯენიფერ ერმოსომ ისიც თქვა, რომ ფედერაცია მას და მის მეგობრებსა და ოჯახის წევრებს წნეხის ქვეშ აქცევდა, რომ რუბიალესის გამამართლებელი განცხადება გაევრცელებინათ.

მალე მედიაში ინფორმაცია გავრცელდა, რომ რუბიალესი ინციდენტის გამო თანამდებობის დატოვებას აპირებდა, თუმცა ასე არ მოხდა. ამის ნაცვლად, ახლა ესპანეთის ფეხბურთის ფედერაცია ერმოსოს კოცნის შესახებ ტყუილში ადანაშაულებს და სასამართლოში ჩივილითაც კი ემუქრება. ფედერაცია აცხადებს, რომ რუბიალესმა ფეხბურთელს კოცნის ნებართვა სთხოვა და მიიღო კიდეც.

ერმოსოს მხარდასაჭერად და პროტესტის ნიშნად ესპანეთის ქალთა ნაკრების 23-მა წევრმა და 50-მა სხვა ქალმა ფეხბურთელმა განაცხადეს, რომ მატჩებში მონაწილეობას აღარ მიიღებდნენ, სანამ რუბიალესი თანამდებობას არ დატოვებდა. ესპანეთის ფეხბურთის ფედერაციამ კი განაცხადა, რომ მათ მატჩებში თამაშის ვალდებულება მაინც აქვთ.

ესპანეთის ქალთა ნაკრებს ფინალში მათი მოწინააღმდეგე ინგლისის ნაკრებმაც გამოუცხადა მხარდაჭერა:

"სექსისტური და პატრიარქალური ორგანიზაციები მიუღებლად იქცევიან. ძალადობა ძალადობაა და სიმართლე ყველამ დავინახეთ", — განაცხადა გუნდმა.

აღსანიშნავია, რომ 26 აგვისტოს ფიფამ რუბიალესს ფეხბურთთან დაკავშირებული უფლებამოსილებები შეუჩერა მანამ, სანამ მისი ქმედებების შესახებ საბოლოო გადაწყვეტილებას გამოიტანს.