რა არის საპენსიო დანაზოგი: 2019 წლიდან საქართველოში დაგროვებითი პენსიის სისტემა მოქმედებს, რომლის მიხედვითაც საპენსიო სქემაში ჩართული მოქალაქეების ანგარიშზე მათი ხელფასის 6% ირიცხება — 2%-ს თავად დასაქმებული, 2%-ს დამსაქმებელი, ხოლო დანარჩენ 2%-ს სახელმწიფო იხდის.

  • სახელმწიფო საპენსიო სქემის მონაწილეს ხელფასის 2%-ს ურიცხავს იქამდე, ვიდრე დარიცხული ხელფასის ჯამური ოდენობა წლიურად 24 000 ლარს არ მიაღწევს;
  • ამის შემდეგ, სახელმწიფო საპენსიო ანგარიშზე ურიცხავს დარიცხული შემოსავლის 1%-ს მანამ, სანამ დარიცხული ხელფასის ჯამური ოდენობა წლიურად 60 000 ლარს გადააჭარბებს;
  • რის შემდეგაც სახელმწიფო ხაზინა დასაქმებულის ინდივიდუალურ საპენსიო ანგარიშზე შენატანებს აღარ განახორციელებს.
  • საპენსიო ასაკის მიღწევის შემდეგ, განცხადების საფუძველზე, მოქალაქე დაიწყებს დაგროვილი საპენსიო თანხის ყოველთვიურ გატანას კონკრეტული ფორმულით.

რა შეიცვალა ახლა: თანხა, რომელიც საპენსიო ანგარიშზე გიგროვდებათ, თქვენთან დაბრუნებამდე ინვესტიციებს ხმარდება, რომლებიც მაღალრისკიან, საშუალორისკიან და ნაკლებრისკიან პორტფელებადაა დაყოფილი.

  • კანონის თანახმად, 2023 წლის 6 აგვისტომდე საპენსიო აქტივების ინვესტირება მხოლოდ ნაკლებადრისკიან პორტფელში ხორციელდებოდა — ეს წესი უკვე აღარ მოქმედებს და თუ თავად არ აირჩევთ რომელი პორტფელი გსურთ, სააგენტო თქვენი ფულის ბედს თქვენს ნაცვლად გადაწყვეტს.
  • ასე შემთხვევაში, შესაძლოა, თქვენი საპენსიო დანაზოგი მაღალრისკიან პორტფელში აღმოჩნდეს.
  • my.pensions.ge-ზე თქვენს პირად გვერდზე უკვე სამივე პორტფელი ჩანს და თუ ელექტრონული ხელმოწერა გაქვთ, არჩევას ვებგვერდიდანვე შეძლებთ.
  • ამის გარდა კიდევ 2 გზა არსებობს: უნდა მიხვიდეთ იუსტიციის სახლის ნებისმიერ ფილიალში, ან საპენსიო სააგენტოს ოფისში (მისამართი: ანა პოლიტკოვსკაიას #14).

ვადა 6 სექტემბერს იწურება — პორტფელის შესაცვლელად მხოლოდ 16 დღე გაქვთ დარჩენილი.

რა განსხვავებაა პორტფელებს შორის: სააგენტოს განმარტებით, სტაბილური ანუ ნაკლებადრისკიანი პორტფელი სტაბილური მომგებიანობით და შედარებით ნაკლები რისკით ხასიათდება — ინვესტირება ძირითადად საპროცენტო ინსტრუმენტებში ხორციელდება, ხოლო გლობალური აქციების წილი 20%-ია.

  • "სტაბილური პორტფელი მეტად შეეფერება ისეთ ადამიანს, ვინც ინვესტიციებში სიფრთხილეს ანიჭებს უპირატესობას და არ უყვარს რისკის აღება", — აცხადებს სააგენტო.
  • საშუალორისკიანი პორტფელი ნაკლებადრისკიანი და მაღალრისკიანი პორტფელების ნაზავია — უწყებაში ამბობენ, რომ ეს პორტფელი შედარებით დაბალანსებულადაა ინვესტირებული საპროცენტო ინსტრუმენტებსა და გლობალურ აქციებში, რომლის წილი 35%-ია.
  • რაც შეეხება მზარდ ანუ მაღალრისკიანი პორტფელს უმეტესად უცხოურ ვალუტაში და გლობალურ აქციებშია ინვესტირებული და როგორც უწყებაში ამბობენ, გრძელვადიან პერიოდში მოსალოდნელი ამონაგები მნიშვნელოვნად აღემატება დაბალრისკიანი პორტფელის ამონაგებს.
  • კერძოდ, გლობალური აქციების წილი პორტფელის 55%-მდეა, ხოლო საპროცენტო ინსტრუმენტების წილი შედარებით დაბალია.
  • "მზარდი პორტფელი მეტად შეეფერება ისეთ ადამიანს, ვისაც გააჩნია გრძელვადიანი საინვესტიციო პერიოდი, უყვარს რისკის აღება და ამის ხარჯზე, ხანგრძლივ ვადაში, სურს მაღალი მოგების მიღება", — წერს სააგენტო.