პრეზიდენტმა ალექსანდრ ლუკაშენკომ ბელარუსის დიპლომატიური მისიების ხელმძღვანელებთან შეხვედრისას რუსეთთან ურთიერთობებთან დაკავშირებით განცხადება გააკეთა. მისი თქმით, რუსეთი ბელარუსისთვის უსაფრთხოების გარანტიაა. ამის შესახებ ინფორმაციას რუსული მედია ავრცელებს.

"არაფერს ვამბობ რუსეთთან სამხედრო-პოლიტიკურ თანამშრომლობაზე, განსაკუთრებით სამხედრო სფეროში. რომ არა ჩვენი სიმტკიცე 2020 წელს, კარგად ვიცით, რა მოხდებოდა. და რომ არა რუსეთის მხარდაჭერა იმ რთულ დროს — დაწყებული ჩვეულებრივი იარაღით და დამთავრებული ბირთვული შეიარაღებით — ძნელად წარმოსადგენია, რა მდგომარეობაში ვიქნებოდით დღეს. ალბათ უკვე პირდაპირ შევეჯახებოდით დასავლეთს და ნატოს ბლოკს...
ამიტომაც არის რუსეთი ჩვენი უსაფრთხოების გარანტი," — აღნიშნა ბელარუსის ლიდერმა.

ლუკაშენკომ ასევე უარყო მოსაზრება, რომ ბელარუსის მრავალპოლარულმა პოლიტიკამ შეიძლება ქვეყნის მთავარ პარტნიორებთან — რუსეთთან და ჩინეთთან — ურთიერთობებს ავნოს.

"არაფერი ამის მსგავსი! სანამ მე ვარ პრეზიდენტი, უნდა გახსოვდეთ ერთი აქსიომა: ჩვენთვის რუსეთზე და რუს ხალხზე ახლობელი არავინაა და ვერ იქნება," — განაცხადა ლუკაშენკომ.