ისრაელის პრემიერმინისტრი ბენიამინ ნეთანიაჰუ ღაზის სრული ოკუპაციის ბრძანების გაცემას აპირებს, მიუხედავად თავდაცვის ძალების გენშტაბის წინააღმდეგობისა. ამის შესახებ ინფორმაციას Times of Israel ავრცელებს.

მათი ინფორმაციით, ნეთანიაჰუ განიხილავს ოპერაციების გაფართოებას იმ რეგიონებშიც კი, სადაც მძევლები ჯერ კიდევ შეიძლება იმყოფებოდნენ.

ამჟამად ისრაელის თავდაცვის ძალებს (IDF) კონტროლი დაახლოებით ღაზას 75%-ზე აქვთ, თუმცა სამხედრო ხელმძღვანელობა დარჩენილი ტერიტორიის დაკავების წინააღმდეგია. ეს ტერიტორიები მჭიდროდ დასახლებულ ურბანულ ზონებს მოიცავს. მათი თქმით, ეს საფრთხეს უქმნის მძევლების სიცოცხლეს და მოითხოვს ხანგრძლივ და რთულ ოპერაციებს ჰამასის სტრუქტურის საბოლოოდ გასანადგურებლად.

ნეთანიაჰუ უახლოეს დღეებში საკითხის განხილვას უსაფრთხოების კაბინეტში გეგმავს.

რამდენიმე მემარჯვენე მინისტრი მხარს უჭერს სრულ ოკუპაციას, თუმცა 600-ზე მეტი ვეტერანი და უსაფრთხოების სფეროს ყოფილი მაღალჩინოსანი ამ ნაბიჯს ეწინააღმდეგება, მიიჩნევს რა, რომ ის გააღრმავებს ჰუმანიტარულ კრიზისს, დააზარალებს მძევლებს და გაამწვავებს ისრაელის საერთაშორისო იზოლაციას.