გაეროს ადამიანის უფლებათა უმაღლესმა კომისარმა, ვოლკერ თურქმა, განაცხადა, რომ ადამიანის სიცოცხლის გადარჩენა ღაზაში ყველასთვის უმთავრესი პრიორიტეტი უნდა იყოს. ამის შესახებ ინფორმაციას Sky News ავრცელებს.

"ისრაელი კვლავაც მკაცრად ზღუდავს ჰუმანიტარული დახმარების შეტანას ღაზაში, და ის მცირე მოცულობის დახმარება, რომელსაც შესვლის ნებას რთავენ, არსებულ საჭიროებებს სავსებით ვერ აკმაყოფილებს," — განაცხადა თურქმა.

მისივე თქმით, სამოქალაქო მოსახლეობისთვის საკვებზე წვდომის შეზღუდვამ შეიძლება ომის დანაშაულის ნიშნები შეიძინოს.

"ისრაელმა დაუყოვნებლივ უნდა უზრუნველყოს ჰუმანიტარული დახმარების სწრაფი და შეუფერხებელი მიწოდება საკმარისი ოდენობით, რათა თავიდან ავიცილოთ დამატებითი, გაუმართლებელი ტანჯვა და სიცოცხლის დაკარგვა...სამოქალაქო მოსახლეობისთვის საკვებზე წვდომის შეზღუდვამ შეიძლება ომის დანაშაულის ნიშნები შეიძინოს და, გარკვეულ პირობებში, კაცობრიობის წინააღმდეგ ჩადენილ დანაშაულადაც შეფასდეს," — განაცხადა გაეროს ადამიანის უფლებათა უმაღლესმა კომისარმა.