თბილისის საქალაქო სასამართლოში ნაციონალური მოძრაობის პოლიტსაბჭოს წევრს, ლაშა ცანავას პატიმრობა შეეფარდა.

ცანავამ დღევანდელ სასამართლო პროცესზე განაცხადა, რომ მისი დაკავების რეალური მიზეზი მისი თანაპარტიელის, ლევან ხაბეიშვილის წინააღმდეგ კომპრომატების შეგროვების მოთხოვნა იყო, რაზეც მან უარი განაცხადა.

"გასაგებია, რატომაც დამაკავეს. "მოდულის" შენობაში ორი დიდი თანამდებობის პირი მოვიდა და მესაუბრა. შემომთავაზა თავისუფლება, დიდი ოდენობით თანხა და ამისთვის ჩემი უახლოესი მეგობრის — ლევან ხაბეიშვილის ყველა ნაბიჯის ჩაიწერა, სად მიდის, ვის ელაპარაკებაო.

მე ლევანის უახლოესი გარემოცვა ვარ. მათი[სუს-ის] სულ უფროსი, ლევანის ბევრჯერ უხსენებია, ოხანაშვილზეა საუბარი, ლევანზე გამწარებული, უნდოდათ ჩემი ხელით ჩამეწერა, მესმინა, მეთანამშრომლა. ასეთ რაღაცას ცხოვრებაში არ გავაკეთებ. ჩემთვის კაცობა და ერთგულებაა პირველი," — განაცხადა ცანავამ.

ლაშა ცანავას ბრალი დიდი ოდენობით თაღლითობის მცდელობის ფაქტზე წარედგინა, რაც ჯარიმას ან 6-დან 9 წლამდე თავისუფლების აღკვეთს ითვალისწინებს. პროკურატურის ინფორმაციით, ცანავა უცხო ქვეყნის მოქალაქეებს საქართველოში ბინადრობის სანაცვლოდ 5 600 დოლარს სთხოვდა.