"ოცნების" პრემიერმინისტრი, ირაკლი კობახიძე ზღვაზე გასასვლელის არ მქონე ქვეყნების შესახებ, გაეროს კონფერენციას ესწრება. ამის შესახებ ინფორმაციას თავად კობახიძე საკუთარ სოციალურ ქსელში ავრცელებს.

ირაკლი კობახიძე კონფერენციაზე სიტყვითაც გამოვა და მისივე ცნობით, საქართველოს სტრატეგიულ მდებარეობაზე, ქვეყნის — როგორც აღმოსავლეთისა და დასავლეთის დამაკავშირებელი დერეფნის — როლზე ისაუბრებს.

"თურქმენეთში, ავაზაში, გაეროს კონფერენციაში ვმონაწილეობ.

კონფერენციის მონაწილე ლიდერებს თურქმენეთის პრეზიდენტი სერდარ ბერდიმუჰამედოვი და გაეროს გენერალური მდივანი ანტონიო გუტიერეში გვმასპინძლობენ.

დავესწარი კონფერენციის ოფიციალურ გახსნას, რომლის მონაწილეებსაც სიტყვით მოგვმართეს ანტონიო გუტიერეშმა და სერდარ ბერდიმუჰამედოვმა.

კონფერენციაზე დღეს სიტყვით გამოვალ. აქცენტს გავაკეთებ საქართველოს სტრატეგიულ მდებარეობაზე, ქვეყნის — როგორც აღმოსავლეთისა და დასავლეთის დამაკავშირებელი დერეფნის — როლზე, რომელიც ზღვაზე გასასვლელის არმქონე 8 ქვეყანას დაკავშირებადობის კუთხით მნიშვნელოვან შესაძლებლობებს სთავაზობს.

გაეროს კონფერენციის გახსნამდე სამიტის მონაწილე სახელმწიფოთა ლიდერებს სიტყვით მოგვმართა თურქმენეთის ეროვნულმა ლიდერმა, სახალხო საბჭოს თავმჯდომარე გურბანგული ბერდიმუჰამედოვმა.

ოფიციალურ ღონისძიებას ავაზას კონგრესცენტრში დელეგაციასთან ერთად დავესწარი", — წერს კობახიძე სოციალურ ქსელში.