ფინანსთა სამინისტროს საგამოძიებო სამსახურმა ა(ა)იპ სოფლის განვითარების სააგენტოს პროექტების მართვისა და ტექნიკური დახმარების დეპარტამენტის ხელმძღვანელი თორნიკე კაპანაძე დააკავა.

ფინანსთა სამინისტროში გამართულ ბრიფინგზე სამსახურის უფროსის მოადგილემ, ელგუჯა თავბერიძემ განმარტა, რომ კაპანაძე ორგანიზებული დანაშაულებრივი ჯგუფის საქმიანობაში პირადი ქონებრივი სარგებლის მიღების მიზნით მონაწილეობდა. მისი თქმით, კაპანაძე სააგენტოს ყოფილ თანამშრომელ ლ.დ.-თან და დანაშაულებრივი ჯგუფის სხვა წევრებთან ერთად უკანონოდ მოპოვებული თანხების გადანაწილებაში იყო ჩართული. უწყების განცხადებით 826 815 ლარის ოდენობით თანხაზეა საუბარი.

"საზოგადოებას შევახსენებთ, რომ საგამოძიებო სამსახურში მიმდინარე გამოძიების ფარგლებში, 2025 წლის 18 ივლისს, "სასოფლო — სამეურნეო ტექნიკის თანადაფინანსების სახელმწიფო პროგრამის" ფარგლებში გაცემული გრანტების, ჯამში 826 815 ლარის თაღლითურად დაუფლების ფაქტზე, დაკავებულია 11პირი, მათ შორის ერთ-ერთი ორგანიზატორი — ა(ა)იპ "სოფლის განვითარების სააგენტოს" ყოფილი თანამშრომელი ლ.დ.

გამოძიებით დადგენილია, რომ 2021-2024 წლებში, ბრალდებულებმა გრანტების მისაღებად, სხვადასხვა ბენეფიციარის სახელით არაერთხელ მიმართეს ა(ა)იპ -სოფლის განვითარების სააგენტოს და წარუდგინეს ყალბი ინვოისები, სასაქონლო ზედნადებები, ტექნიკის მიღება-ჩაბარების აქტები და აუდიტორული დასკვნები.

წარდგენილი ყალბი დოკუმენტების საფუძველზე, სააგენტომ ბრალდებულებს, მათივე მფლობელობაში არსებულ საბანკო ანგარიშებზე ჩაურიცხა სასოფლო-სამეურნეო ტექნიკის შესაძენად გამოყოფილი თანადაფინანსების თანხა — 826 815 ლარის ოდენობით.

სახელმწიფოზე მიყენებული ზიანის ანაზღაურების უზრუნველსაყოფად, დაყადაღებულ იქნა ბრალდებულისა და მასთან კავშირში მყოფი პირების სახელზე რიცხული დიდი ოდენობით ქონება და საბანკო ანგარიშები.

გამოძიება მიმდინარეობს საქართველოს სისხლის სამართლის კოდექსის 210-ე, 180-ე და 362-ე მუხლებით, რაც სასჯელის სახედ და ზომად ითვალისწინებს თავისუფლების აღკვეთას შვიდიდან ათ წლამდე ვადით.

სახელმწიფოზე მიყენებული ზიანის სრული ოდენობის დადგენისა და დამნაშავე პირთა წრის გაფართოების მიზნით, ინტენსიურად გრძელდება საგამოძიებო მოქმედებები.

საქართველოს ფინანსთა სამინისტროს საგამოძიებო სამსახური მომავალშიც გაატარებს საფინანსო-ეკონომიკურ სფეროში ჩადენილი დანაშაულის წინააღმდეგ მკაცრ სისხლის სამართლის პოლიტიკას," — განაცხადა უწყებამ.