კახა კალაძემ, მისი მერობის კანდიდატად წარდგენის შემდეგ, სიტყვით გამოსვლისას განაცხადა, რომ თავისი გუნდის მიზანი იქნება მოწესრიგებული სოციალური ფონი და ეკოლოგია, ავტომობილების მოძრაობა, პარკინგი და საზოგადოებრივი ტრანსპორტის მოდერნიზაცია, ქაოტური მშენებლობების დარეგულირება, ძველი თბილისის რეაბილიტაცია-კონსერვაცია, მშენებლობების ხარისხი და უსაფრთხოების დაცვის სავალდებულო და აუცილებელი მოთხოვნა.

მისი ერთ-ერთი დანაპირებია, რომ ის იმუშავებს არა მხოლოდ ქალაქისთვის, არამედ თითოეული თბილისელისთვის:

"ჩვენი ვალდებულებაა, რომ ყველა ეროვნების, იდენტობის, თუ სარწმუნოების მქონე, თავს გრძნობდეს ამ დიდი ტრადიციების მქონე ქალაქის ორგანულ ნაწილად. ჩვენთან ტოლერანტობა ყოველთვის იყო აყვანილი სახელმწიფოს პოლიტიკის ხარისხში. ჩემი მიზანი და ვალდებულებაა ქალაქის წარსული, აწმყო და მომავალი, ტრადიციები და სიახლეები ჰარმონიულად ერწყმოდეს ერთმანეთს".

კალაძემ ასევე წარსული გაიხსენა და თქვა, რომ თბილისთან ემოციურად არის დაკავშირებული:

"თბილისი წლების განმავლობაში ჩემი გულშემატკივარი იყო, ჩემთან ერთად ზეიმობდა გამარჯვებას და მეფერებოდა გაჭირვების ჟამს. მან გულში ჩამიკრა და უდიდესი წვლილი შეიტანა ჩემს გამარჯვებებში. ჩემს ცხოვრებაში იყო ბევრი გამარჯვება და მისკენ სავალი ძალიან ძალიან რთული გზები. მაგრამ ყოველთვის მყავდა გვერდით გუნდი, ფეხბურთშიც ძალადობრივ რეჟიმთან ბრძოლაშიც და ენერგეტიკაშიც".

კახა კალაძე ამომრჩეველს ჰპირდება, რომ მისი არჩევნის შემთხვევაში, თბილისს თავისი საუკუნოვანი ხიბლი დაუბრუნდება.