რა ხდება: 11-12 ივლისს, ვილნიუსში NATO-ს სამიტი გაიმართება.

  • ერთი დღით ადრე, 10 ივლისს, თურქეთის პრეზიდენტმა, რეჯეფ ტაიპ ერდოღანმა განაცხადა, რომ აპირებს, სამიტზე ალიანსის წევრებს მიმართოს, გზა გაუხსნან თურქეთს ევროკავშირის წევრობისკენ, სანაცვლოდ კი, ის მხარს დაუჭერს შვედეთის ნატოში გაწევრიანებას.
  • ერდოღანი შვედეთის ალიანსში გაწევრიანებას ორ ქვეყანას შორის არსებული ხანგრძლივი უთანხმოების გამო ბლოკავს.
  • ოფიციალური ანკარა ფიქრობს, რომ შვედეთს ქურთ მებრძოლებთან არასაკმარისად მკაცრი პოლიტიკა აქვს.
  • თურქეთში მიიჩნევენ, რომ სტოკჰოლმი მფარველობს ეთნიკური ქურთების ჯგუფებს, რომლებსაც ისინი საფრთხედ მიიჩნევენ და ტერორისტულ ორგანიზაციებად აღიარებენ.

ერდოღანის განცხადებით, შვედეთის ნატოში გაწევრიანება დამოკიდებულია იმ საკითხების შესრულებაზე, რომლებიც გასული წლის სამმხრივ შეთანხმებაშია გაწერილი.

  • მისივე შეფასებით, შვედეთს ამ მიმართულებით საკმარისი პროგრესი არ აქვს.
  • "მოვუწოდეთ ქვეყნებს, რომლებიც თურქეთს ევროკავშირის კარიბჭესთან 50 წელზე მეტია, ალოდინებენ, პირველ რიგში, მოდით, გზა გავუხსნათ თურქეთს ევროკავშირში და შემდეგ ჩვენ გავუხსნით გზას შვედეთს, როგორც ეს ფინეთისთვის გავაკეთეთ", – თქვა თურქეთის ლიდერმა სამიტზე გამგზავრების წინ გამართულ პრესკონფერენციაზე.
  • Associated Press-ის ინფორმაციით, რეჯეფ თაიფ ერდოღანი ამ საკითხზე შვედეთის პრემიერმინისტრს, ულფ კრისტერსონს შეხვდება.

ამერიკის პრეზიდენტი, ჯო ბაიდენი, ერდოღანს თურქეთისთვის F-16-ების მიყიდვას სთავაზობს, თუკი ის შვედეთის ნატოში გაწევრიანებას დაუშვებს.

  • თუმცა, The Guardian ინფორმაციით, აშშ თურქეთისთვის მოიერიშე თვითმფრინავების მიყიდვას მხოლოდ იმ პირობით დასთანხმდება, თუ ისინი საბერძნეთის წინააღმდეგ არ იქნება გამოყენებული.