რადიო თბილისი სოციალურ ქსელში პოსტს ავრცელებს, სადაც ამბობს, რომ მათ ეთერში მომღერალ ნუცა ბუზალაძის სიმღერები აღარ გავა. მათი ეს განცხადება 24 ივნისს ინტერნეტსივრცეში გავრცელებულ ვიდეოს მოჰყვა, რომელშიც რამდენიმე ქართველი მომღერალი, მათ შორის, ნუცა ბუზალაძე, მოსკოვის ერთ-ერთ რესტორანში სიმღერა სამშობლოს ასრულებს. რადიოსადგურის დირექტორმა რამაზ სამხარაძემ მომღერლის რუსეთში ჩასვლა სოციალურ ქსელში გუშინვე გააკრიტიკა.

"ნუცა ბუზალაძის სიმღერები ჩვენი რადიოსადგურების ეთერში (რადიო თბილისი, რადიო ციტრუსი, რადიო ჰერეთი) აღარ გავა. ჩვენი პოზიცია ყველასთვის ცნობილია რუსეთთან, რუსულ სიმღერებთან და ამ ქვეყანასთან აფილირებული მომღერლების შესახებ. რადიო თბილისი იყო პირველი რადიოსადგური, რომელიც American Idol-ის შოუს აქტიურად აშუქებდა. სწორედ, რადიო თბილისის ფეისბუქ გვერდზე ნახა ასიათასობით ადამიანმა ნუცას წარმატებების შესახებ.

[...] ეს არ არის პირველი შემთხვევა, როცა რადიო თბილისმა მომღერალი ეთერიდან ჩახსნა. 6 მაისს, ეთერიდან რეპერ "მასტერის" სიმღერები მას შემდეგ ჩაიხსნა, რაც მან ანტიევროპული გზავნილები გააჟღერა", — წერია რადიოს განცხადებაში.

რუსეთში სიმღერას სოციალურ ქსელში გამოეხმაურა თავად ბუზალაძეც, რომელმაც მხარდამჭერებს ბოდიში მოუხადა და თქვა, რომ დაბადების დღეზე მეგობრის თხოვნით იმღერა.

გავრცელებულ ვიდეოებში ვხედავთ რუსეთში მოღვაწე მომღერალ სოსო პავლიაშვილს და მეგი გოგიტიძესაც, რომელიც უკრაინის ომის ფონზეც აგრძელებდა რუსეთში სიმღერას. წვეულებას ესწრებოდა პუტინისტური ძალადობრივი ჯგუფის, ალტ-ინფოს დამფუძნებელი, კონსტანტინე მორგოშიაც. დაბადების დღიდან ვიდეოებს სოციალურ ქსელში ეკატერინა სტეფანოვა ავრცელებს.

ამავე თემაზე: