პროკურატურის განცხადებით, ტრანსნაციონალური დანაშაულები გახსნეს.

რატომ არის მნიშვნელოვანი: სამართალდამცავი უწყების ცნობით, დანაშაულებრივი ჯგუფის წევრებმა ფინანსურ ინსტიტუტში თანხის დაბანდებისას მაღალი საპროცენტო განაკვეთის მიღების მიზნით, ინტერნეტში ყალბი რეკლამა განათავსეს და აშშ-ის მოქალაქეებს დიდი ოდენობით თანხები საქართველოში, მათივე დაფუძნებული საწარმოს საბანკო ანგარიშებზე მოტყუებით ჩაარიცხვინეს.

  • ამ გზით ბრალდებულები დაზარალებულთა კუთვნილ დაახლოებით 1 820 000 აშშ დოლარს დაეუფლნენ.
  • ერთ-ერთმა ბრალდებულმა კანონიერი სახის მისაცემად თანხის ნაწილი დანაწევრებით გადარიცხა სხვადასხვა ქვეყანაში მასთან დაკავშირებული იურიდიული პირების ანგარიშებზე, რა გზითაც 1 770 000 აშშ დოლარის ლეგალიზაცია მოახდინა.

გამოძიებით გამოვლენილია კიდევ ერთი ტრანსნაციონალური დანაშაული.

  • საფრანგეთში მოქმედი საწარმოების კუთვნილი დიდი ოდენობით თანხის მოტყუებით დაუფლების მიზნით უცხო ქვეყნის მოქალაქემ ოფშორული კომპანია დაარეგისტრირა და საქართველოში მოქმედ საბანკო დაწესებულებაში საწარმოს ანგარიშები გახსნა.

  • ბრალდებული ხსენებული საწარმოების კუთვნილ 445 000 ევროს მოტყუებით დაეუფლა, ფიქტიური დანიშნულებებისა და ყალბი დოკუმენტების საფუძველზე კი, 100 000 ევროს ლეგალიზაცია მოახდინა.

დანაშაულები 9-დან 12 წლამდე პატიმრობას ითვალისწინებს.

  • იურიდიულ პირებს კი ბრალდება უკანონო შემოსავლის ლეგალიზაციის ფაქტზე წარედგინა, რასაც თან ახლდა განსაკუთრებით დიდი ოდენობით შემოსავლის მიღება.
  • სასჯელის სახედ და ზომად ლიკვიდაცია ან საქმიანობის უფლების ჩამორთმევა და ჯარიმაა გათვალისწინებული.