მიმდინარე წლის პირველ ნახევარში კონტროლიორების მიერ უბილეთო მგზავრთა დაჯარიმების შედეგად ხაზინაში 1.660 მილიონ ლარზე მეტი შევიდა, რაც გასული წლის ანალოგიური პერიოდის მაჩვენებელს 68%-ით აღემატება. ინფორმაციას BPN ავრცელებს.

ფინანსთა სამინისტროს საქართველოს ნაერთი ბიუჯეტის შემოსულობების მონაცემების თანახმად, 2026 წლის იანვარ-ივნისში უბილეთო მგზავრობის სანქციებიდან ბიუჯეტში 1 660 792 ლარი აკუმულირდა. შედარებისთვის, 2025 წლის იმავე 6 თვეში აღნიშნულმა მუხლმა ხაზინას 990 165 ლარი მოუტანა.

იზრდება ჯარიმებიდან და საურავებიდან მიღებული ჯამური შემოსავალიც
ხაზინის სტატისტიკა აჩვენებს, რომ წელს საერთო ჯამშიც საგრძნობლად არის გაზრდილი სანქციებიდან, ჯარიმებიდან და საურავებიდან მიღებული მთლიანი საბიუჯეტო შემოსავლები:

2025 წლის იანვარი-ივნისი — 174 588 123 ₾
2026 წლის იანვარი-ივნისი — 297 567 586 ₾

ცნობისთვის, დედაქალაქში საზოგადოებრივი ტრანსპორტით უბილეთოდ გადაადგილებისას მოქმედებს 20-ლარიანი ჯარიმა. კანონით დადგენილ 30-დღიან ვადაში თანხის გადაუხდელობის შემთხვევაში, სამართალდამრღვევს დამატებით 40 ლარის ოდენობის საურავი ერიცხება.