თბილისში ერთი პირი დააკავეს, რომელმაც საკუთარ მეგობარს დიდი ოდენობით თანხა მოტყუებით გამოსძალა. ინფორმაციას შსს ავრცელებს.

უწყების ინფორმაციით, ბრალდებული დაზარალებულს შეჰპირდა, რომ ონლაინ აუქციონზე ავტომობილს იყიდდა და მას საქართველოში ჩამოყვანაში დაეხმარებოდა. მან ამ საბაბით მეგობარს 16 800 აშშ დოლარი გამოართვა, თუმცა პირობა არ შეასრულა და ფული მიითვისა.

პოლიციამ მამაკაცი მოსამართლის განჩინების საფუძველზე დააკავა. საქმეზე გამოძიება დიდი ოდენობით თაღლითობის მუხლით მიმდინარეობს, რაც ბრალის დამტკიცების შემთხვევაში 9 წლამდე ვადით პატიმრობას ითვალისწინებს.

"შინაგან საქმეთა სამინისტროს თბილისის პოლიციის დეპარტამენტის საგამოძიებო მთავარი სამმართველოს თაღლითობის წინააღმდეგ ბრძოლის სამმართველოს და დეტექტივების მთავარი სამმართველოს თანამშრომლებმა, დიდი ოდენობით თანხის თაღლითურად დაუფლების ბრალდებით, ერთი პირი დააკავეს.

გამოძიებით დადგინდა, რომ ბრალდებული მეგობარს, ონლაინ აუქციონის გზით ავტომობილის შეძენასა და საქართველოში ტრანსპორტირებაში დახმარებას დაჰპირდა, აღნიშნული მოტივით მას დიდი ოდენობით თანხა გამოართვა, თუმცა დანაპირები არ შეასრულა და დაზარალებულის კუთვნილ 16 800 აშშ დოლარს თაღლითურად, მართლსაწინააღმდეგოდ დაეუფლა.

სამართალდამცველებმა ჩატარებული ოპერატიული ღონისძიებებისა და საგამოძიებო მოქმედებების შედეგად, მამაკაცი მოსამართლის განჩინების საფუძველზე ბრალდებულის სახით დააკავეს.

გამოძიება სისხლის სამართლის კოდექსის 180-ე მუხლის მე-3 ნაწილით მიმდინარეობს, რაც 9 წლამდე თავისუფლების აღკვეთას ითვალისწინებს", — აღნიშნულია შსს-ს გავრცელებულ ინფორმაციაში.