ნიკარაგუას პრეზიდენტმა, დანიელ ორტეგამ განაცხადა, რომ ქვეყანაში არჩევნები აღარ ჩატარდება. ამ განცხადებით 78 წლის ავტორიტარმა ლიდერმა საბოლოოდ დაუსვა წერტილი ოპოზიციის იმედებს დემოკრატიული არჩევნების ჩატარების შესახებ და თითქმის 20-წლიანი მმართველობის განუსაზღვრელი ვადით გაგრძელება დაადასტურა. ინფორმაციას AP ავრცელებს.

ორტეგას განცხადებით, გაუქმდა 2027 წლის ნოემბერში დაგეგმილი საპრეზიდენტო არჩევნები. აღნიშნულს წინ უძღოდა 2025 წლის იანვარში მთავრობის მიერ კონტროლირებადი პარლამენტის გადაწყვეტილება, რომელმაც საპრეზიდენტო ვადა 5-დან 6 წლამდე გაზარდა.

სანდინისტური რევოლუციის წლისთავზე გამოსვლისას — მოვლენის, რომელმაც 1979 წელს სომოსას დიქტატურა დაამხო და ორტეგა პირველად მოიყვანა ხელისუფლებაში — ნიკარაგუას ლიდერმა აშშ-ის მისამართით მკაცრი გზავნილები გააჟღერა.

"არჩევნები აღარ ჩატარდება. იანკებისა და სომოსას რეჟიმის მიერ დასმული პარტიების ხელისუფლებაში დაბრუნება — ეს ისტორია დასრულებულია. არასოდეს, არასოდეს, არასოდეს!" — განაცხადა ორტეგამ.

AP წერს, რომ ორტეგა, რომელიც ხელისუფლებაში 2007 წელს დაბრუნდა, წლების განმავლობაში ხელისუფლების ყველა შტოს აკონტროლებს. 2018 წლის მასობრივი საპროტესტო აქციების სისხლიანი დარბევის შემდეგ, ორტეგა და მისი მეუღლე — ვიცეპრეზიდენტი როსარიო მურილიო რეპრესიულ მეთოდებს აქტიურად იყენებენ.

2021 წლის არჩევნებში ორტეგამ თავი გამარჯვებულად მას შემდეგ გამოაცხადა, რაც ყველა რეალური ოპონენტი ციხეში ჩასვა. აღნიშნულ არჩევნებს საერთაშორისო საზოგადოება და აშშ ლეგიტიმურად არ ცნობენ.