ჰარი პოტერის სერიალის გადაღებები ახალგაზრდა მსახიობების სასკოლო განრიგის გამო განსაკუთრებით რთული აღმოჩნდა. სერიალის ოპერატორის, ადრიანო გოლდმანის თქმით, გადამღებ ჯგუფს ბავშვებისთვის გამოყოფილ მცირე დროში ბევრი სცენის გადაღება უწევს, რაც სამუშაოს ტემპსა და ხარისხზე მოქმედებს.

"რაც უფრო სწრაფად იღებ, მით მეტ კომპრომისზე მიდიხარ ხარისხის მხრივ. მიუხედავად იმისა, რომ ბევრი რესურსი გვაქვს, პროცესი მაინც ძალიან რთულია. ბავშვ მსახიობებთან მუშაობისას დრო მკაცრად არის შეზღუდული, ამიტომ, სანამ ისინი გაკვეთილებზე არიან, თითქმის ყველა სცენა წინასწარ უნდა მოამზადო", — თქვა მან.

ფოტო: HBO

ჰარი პოტერის, რონ უისლისა და ჰერმიონ გრეინჯერის როლების შემსრულებლები — დომინიკ მაკლაფლინი, ალასტერ სტაუტი და არაბელა სტენტონი — გადასაღებ მოედანზე ზოგჯერ მხოლოდ საათ-ნახევარს ატარებენ. ამ მცირე დროში ჯგუფმა რამდენიმე სხვადასხვა კადრის მომზადება და გადაღება უნდა მოასწროს.

როდესაც ბავშვები გაკვეთილებს ესწრებიან, ჯგუფი სცენებს მათ გარეშე წინასწარ იღებს, შემდეგ კი მსახიობების მონაწილეობით საჭირო კადრებს ამატებს. ამის გამო ეპიზოდები ქრონოლოგიური თანმიმდევრობით არ იქმნება და გადაღების პროცესი უფრო რთულდება.

მკაცრი განრიგის მთავარი მიზეზი ისაა, რომ ახალგაზრდა მსახიობები გადაღებებთან ერთად სწავლობენ კიდეც. ცნობილია, რომ Warner Bros.-ის Leavesden-ის სტუდიაში, სადაც ჰარი პოტერს იღებენ, მსახიობებისთვის დროებითი სკოლაც კია მოწყობილი. სკოლა სამუშაო დღეებში დილიდან საღამომდე მუშაობს, რათა ახალგაზრდა მსახიობებმა სწავლა ღამის გადაღებებს, დამატებით სცენებსა და სხვადასხვა ლოკაციაზე მუშაობას შეუთავსონ.

ჰარი პოტერის სერიალის პრემიერა HBO-სა და HBO Max-ზე 2026 წლის 25 დეკემბერს იგეგმება.

ასევე იხილეთ: