თელავის სასტუმროში მომხდარ ინციდენტში მონაწილე უცხო ქვეყნის მოქალაქეებს ქვეყნის დატოვება აეკრძალათ — ამის შესახებ დაზარალებული ქალის ადვოკატმა, ლალი აფციაურმა, NEWS.On.ge-ს განუცხადა.

მისი განმარტებით, აღნიშნული აკრძალვა მიმდინარე საგამოძიებო მოქმედებებს უკავშირდება და მას ოფიციალური სახე არ აქვს.

"რამდენიმე დღის განმავლობაში საგამოძიებო მოქმედებებია ჩასატარებელი და გამოძიებამ ითხოვა, რომ ქვეყნიდან არ გასულიყვნენ. პირველ სამ დღეში ყველაფრის მოსწრებაა საჭირო. ჩემს დაცვის ქვეშ მყოფს ხელმეორედ გამოკითხავენ. ოფიციალური, წერილობითი აკრძალვა არ არსებობს — ეს სიტყვიერი თხოვნა იყო," — განაცხადა ადვოკატმა.

მისივე თქმით, ინციდენტში მონაწილე ქალები ეროვნებით უკრაინელები არიან, თუმცა რუსეთის მოქალაქეობა აქვთ. უშუალოდ დაზარალებული ქალი რუსეთისა და თურქეთის მოქალაქეა.

კითხვაზე, არსებობს თუ არა იმის შანსი, რომ უცხო ქვეყნის მოქალაქეების წინააღმდეგ სისხლისსამართლებრივი დევნა დაიწყოს, ადვოკატმა ამბობს, რომ მისი დაცვის ქვეშ მყოფის ბრალეულობის დამადასტურებელი არანაირი მტკიცებულება არ არსებობს.

ლალი აფციაური კი ამტკიცებს, რომ არ არსებობს მტკიცებულება, რომელიც დაადასტურებს, რომ უცხო ქვეყნის მოქალაქე ქალები ქორწილის მონაწილეებს შეურაცხყოფას აყენებდნენ. რაც შეეხება გიორგი ჭიღლაძის ყელის არეში არსებულ დაზიანებებს, ადვოკატის თქმით, "ექსპერტიზა დაადგენს" რა ტიპის დაზიანებაა.

"არ ვფიქრობ, რომ ბრალდებულის წინააღმდეგ რაიმე საგამოძიებო მოქმედებების დასაწყებად საფუძველი არსებობს, ამას ხომ კონკრეტული მტკიცებულება სჭირდება? რის საფუძველზე უნდა დაიწყონ დევნა? დადასტურებულია, რომ ამ გოგონებმა ვინმეს აგინეს?

ქორწილის სტუმრები, როგორც დაინტერესებული მხარეები, ბრალდებულის სასარგებლო ჩვენებებს აძლევენ გამოძიებას. აბა, სხვა რა უნდა თქვან მას შემდეგ, რაც ამ ქალბატონს დაარტყეს?

[გიორგი ჭიღლაძის დაზიანებებზე] ჩატარდეს ექსპერტიზა და მან დაადგინოს, ეს ხელით მიყენებული ზიანია თუ რაიმე სხვა საგნით... შეიძლება მე საყელოზე ძლიერად მოგქაჩოთ და ეს ადგილი დაგილურჯდეთ, რადგან საყელოს ნაჭერი უხეში მატერიაა.

ერთადერთი, რასაც ვუყურებ და ეჭვი მეპარება — როგორ შეძლებდა ჩემი დაცვის ქვეშ მყოფი, ასეთი სუსტი გოგო, სხვისთვის ამხელა დაზიანების მიყენებას? ჩატარდეს ექსპერტიზა და მან დაადასტუროს," — განაცხადა ადვოკატმა.

კითხვაზე, ეთანხმება თუ არა დაცვის მხარე პროკურატურის შუამდგომლობას გიორგი ჭიღლაძის გირაოს სანაცვლოდ გათავისუფლების შესახებ, ადვოკატმა აღნიშნა, რომ "არავის დაჭერა არ უხარია" და ამ საკითხს სასამართლო გადაწყვეტს.

ცნობისათვის, ინციდენტში მონაწილე სიძის ძმის, გიორგი ჭიღლაძის ადვოკატმა, ლაშა კაპანაძემ განაცხადა, რომ უცხოეთის მოქალაქე ქალმა მის დაცვის ქვეშ მყოფს ფიზიკური დაზიანება მიაყენა. მან დაზიანებების ამსახველი ფოტო სოციალურ ქსელშიც გაავრცელა.

გიორგი ჭიღლაძე

გიორგი ჭიღლაძე