საქართველოს უზენაესმა სასამართლომ ძალაში დატოვა ქვედა ინსტანციების გადაწყვეტილებები, რომლითაც სსიპ "კულტურული მემკვიდრეობის დაცვის ეროვნული სააგენტოდან" მარინა თაქთაქიშვილის, თეიმურაზ საყვარელიძისა და ე.ს.-ის გათავისუფლება უკანონოდ ცნო. ინფორმაციას ISFED ავრცელებს, რომლის ადვოკატი თეონა კილაძეც სასამართლოში მოსარჩელეთა ინტერესებს იცავდა.

სასამართლოს საბოლოო გადაწყვეტილებით, მოპასუხე მხარეს უკანონოდ დათხოვნილი თანამშრომლებისთვის იძულებითი განაცდურისა და კომპენსაციის გადახდა დაეკისრა.

ISFED-ის ცნობით, პროცესები 2021 წლის 25 ნოემბერს, თეა წულუკიანის კულტურის მინისტრად დანიშვნის შემდეგ დაიწყო. სააგენტოში გამოცხადდა რეორგანიზაცია "თანამშრომელთა კომპეტენციის დადასტურების" საბაბით.

ორგანიზაცია ყურადღებას ამახვილებს პროცესის რამდენიმე მნიშვნელოვან დარღვევაზე:

  • სპეციალისტების კომპეტენციის შესამოწმებლად ტესტირება დაინიშნა ზოგად უნარებსა და მათემატიკაში — პროფესიული კითხვების გარეშე და მინიმალური ზღვარის დადგენის გარეშე.

  • არცერთ ეტაპზე გასაუბრების პროცესს არ ესწრებოდნენ დარგის პროფესიონალები.

  • კომისიაში მოწვეული ექსპერტები (ძირითადად იურისტები) სვამდნენ ზოგად კითხვებს, რომლებსაც არანაირი შეხება არ ჰქონდა თანამშრომელთა საქმიანობასთან.

  • არ ხორციელდებოდა გასაუბრების აუდიო ან ვიდეოჩაწერა.

  • მიუხედავად იმისა, რომ მოსარჩელეებმა 2021 წლის ტესტირებაც და გასაუბრებაც წარმატებით გაიარეს, 9 თვის შემდეგ, 2022 წლის 15 იანვარს, ახალი რეორგანიზაცია გამოცხადდა. შედეგად, მინისტრისთვის "მიუღებელი კადრები" დაკავებულ პოზიციასთან "შეუსაბამობის" მოტივით მაინც გაათავისუფლეს.

ვინ არიან უკანონოდ გათავისუფლებული თანამშრომლები?

მარინა თაქთაქიშვილი — სააგენტოში 2012 წლიდან არამატერიალური კულტურული მემკვიდრეობის მიმართულებით მუშაობდა. იყო სამინისტროს კულტურული მემკვიდრეობის დაცვის საბჭოს წევრი, ამავე საბჭოს სექციის მდივანი და არაერთი სამეცნიერო ნაშრომისა თუ კვლევის ავტორი.

თეიმურაზ საყვარელიძე — სააგენტოში დაფუძნების დღიდან (2009 წლიდან) სამეურნეო განყოფილებაში მოღვაწეობდა და ლოგისტიკურ საკითხებს ზედამხედველობდა.

ე.ს. — 2009 წლიდან ხელმძღვანელობდა აღრიცხვა-ანგარიშგების სამსახურს, ხოლო მოგვიანებით ეკონომიკური სამსახურის უფროსი სპეციალისტი იყო, რომელიც სააგენტოს ფინანსურ ანგარიშებსა და მართვას უზრუნველყოფდა.

"2021 და 2022 წლების რეორგანიზაციების შედეგად სამუზეუმო საქმისა და კულტურული მემკვიდრეობის დაცვის უმაღლესი კლასის სპეციალისტები სამსახურიდან გათავისუფლდნენ. ამ მასშტაბის კვალიფიკაციის მქონე პროფესიონალების თანამდებობიდან გათავისუფლება აუხსნელი და კულტურის სფეროსთვის მნიშვნელოვანი ზიანის მომტანი გადაწყვეტილებაა", — აღნიშნულია ISFED-ის განცხადებაში.