სასტუმრო Agarani Estate-ის უფლებადამცველის, სერგი ცანავას განცხადებით, ინციდენტის შედეგად შექმნილი დისკომფორტის დასაკომპენსირებლად, სასტუმრო მზად არის, გიორგი ჭიღლაძისთვის აღკვეთის ღონისძიების სახით დაკისრებული 5 000-ლარიანი გირაოს თანხა საკუთარი სახსრებით დაფაროს. ადვოკატის კომენტარს IPN ავრცელებს.

ადვოკატის განმარტებით, სამართალდამცველებმა სასტუმროს ტერიტორიაზე საგამოძიებო პროცედურები უკვე ჩაატარეს და საქმისთვის საჭირო მასალები ამოიღეს.

"გუშინ გავავრცელეთ პრეს-რელიზი, საღამოს დამატებითი ინფორმაცია, ვადასტურებთ, რომ კომპანიამ ამ შემთხვევაში მხარეებს შესთავაზა, რომ გარკვეულწილად მათთვის მიყენებული ეს დისკომფორტი შეემსუბუქებინა და დიახ, გირაოს გადახდას ვგულისხმობ. რამდენადაც საქმის კურსში ვართ, ეს დღეს ადვოკატებმა გააჟღერეს, ჩვენც ვადასტურებთ, რომ ეს შეთავაზება განხორციელდა, ჩვენ მზად ვართ, გირაოს ეს თანხა გადავიხადოთ.

საგამოძიებო ორგანოს წარმომადგენლები იყვნენ მოსულები, ჩაატარეს შესაბამისი ჩხრეკა და ამოღება, მათთვის საჭირო დოკუმენტაცია, მტკიცებულებები ამოიღეს", — განაცხადა ცანავამ.

შეგახსენებთ, 18 ივლისს, თელავის მუნიციპალიტეტის სოფელ რუისპირში მდებარე სასტუმრო Agarani Estate-ში დაპირისპირება ქორწილის სტუმრებსა და რუს ტურისტებს შორის მოხდა. არსებული ინფორმაციით, რუსეთის მოქალაქეებმა აივნიდან შეურაცხყოფა მიაყენეს ქორწილის მონაწილეებს და აპარატურას წყალი დაასხეს, რასაც ფიზიკური დაპირისპირება მოჰყვა.

ინციდენტის დროს ფიზიკური დაზიანება მიადგა ერთ-ერთ ქალს. ამასთან, სხეულის (ყელის) არეში არსებულ დაზიანებაზე მიუთითებს თავად ბრალდებულიც.

პოლიციამ მომხდარზე გიორგი ჭიღლაძე დააკავა. მას ბრალდება სისხლის სამართლის კოდექსის 120-ე მუხლის პირველი ნაწილით წარედგინა (ჯანმრთელობის განზრახ მსუბუქი დაზიანება), რაც 3 წლამდე ვადით თავისუფლების აღკვეთას ითვალისწინებს.
სასამართლომ ბრალდებულს 5 000-ლარიანი გირაო შეუფარდა, რის შემდეგაც იგი პატიმრობიდან გათავისუფლდა.