"საერთაშორისო გამჭვირვალობა — საქართველომ" საქართველოში პოლიტიკური პატიმრების განახლებული სია გამოაქვეყნა. ორგანიზაციის ცნობით, ქვეყანაში პოლიტპატიმართა რაოდენობა 100-ს აღწევს, ხოლო წარმოდგენილ დოკუმენტში 90 პირი აკმაყოფილებს პოლიტიკური პატიმრის საერთაშორისო კრიტერიუმებს.

ორგანიზაციაში განმარტავენ, რომ სია შედგენილია ევროპის საბჭოს საპარლამენტო ასამბლეის №1900 (2012) რეზოლუციით დადგენილი კრიტერიუმების საფუძველზე. თითოეული საქმე შეფასებულია ინდივიდუალურად, საქმის გარემოებების, სასამართლო გადაწყვეტილებებისა და ადამიანის უფლებათა საერთაშორისო სტანდარტების გათვალისწინებით.

"საერთაშორისო გამჭვირვალობა — საქართველოს" განცხადებით, წარმოდგენილი სია ეყრდნობა არა პოლიტიკურ შეფასებებს, არამედ ევროპის საბჭოს მიერ დამკვიდრებულ სამართლებრივ ტესტს. აღნიშნული ტესტის მიხედვით, პირი პოლიტიკურ პატიმრად მიიჩნევა, თუ მისი დაკავება უკავშირდება:

  • ფუნდამენტური უფლებების დარღვევას;

  • პოლიტიკური მოტივებით დაკავებას, როდესაც ქმედებას სამართალდარღვევასთან კავშირი არ აქვს;

  • აშკარად არაპროპორციულ სასჯელს;

  • დისკრიმინაციულ მოპყრობას;

  • არასამართლიან სასამართლო პროცესს, რომელიც შეუთავსებელია სამართლიანი სასამართლოს მოთხოვნებთან.

გამოქვეყნებულ დოკუმენტში თითოეული პირის გასწვრივ დეტალურად არის მითითებული, თუ რომელი კრიტერიუმ(ებ)ი ითვლება დაკმაყოფილებულად.

ორგანიზაციის დასკვნით, ქვეყანაში პოლიტპატიმრების ასეთი დიდი რაოდენობა პირდაპირ მიუთითებს საქართველოში პოლიტიკურად მოტივირებული მართლმსაჯულების არსებობასა და ადამიანის უფლებების დაცვის კუთხით ვითარების სერიოზულ გაუარესებაზე.

სია სრულად იხილეთ აქ.