ოკუპირებული ცხინვალის რეგიონის ე.წ. საგარეო საქმეთა სამინისტრო ევროკავშირის სახელით სირიასთან დაკავშირებით გავრცელებულ განცხადებას გამოეხმაურა. მათ მიერ გავრცელებულ განცხადებაში ნათქვამია, რომ ევროკავშირის მიზანს სირიის ხელმძღვანელობაზე ზეწოლა და დამასკოს მიერ სამხრეთ ოსეთისა და აფხაზეთის დამოუკიდებლობის ცნობის გადაწყვეტილების გადახედვა წარმოადგენს.

"ევროკავშირის მხრიდან მსგავს რიტორიკას სუვერენული სახელმწიფოს შიდა საქმეებში უხეშ ჩარევად განვიხილავთ. ევროკავშირი, რომელიც სიტყვიერად აცხადებს ერთგულებას საერთაშორისო სამართლის პრინციპებისა და სახელმწიფო სუვერენიტეტის პატივისცემისადმი, სინამდვილეში ცდილობს უკარნახოს დამოუკიდებელ სირიას, თუ რა საგარეო პოლიტიკური გადაწყვეტილებები უნდა მიიღოს და რომელი უნდა გააუქმოს", — აღნიშნულია განცხადებაში.

ე.წ. სამინისტრომ გაიხსენა, რომ 2018 წელს სირიის მიერ "სამხრეთ ოსეთის" ცნობა იყო სუვერენული სახელმწიფოს თავისუფალი ნების გამოვლენა, რომელიც ეფუძნებოდა ობიექტურ ისტორიულ რეალობასა და ხალხთა თვითგამორკვევის უფლებას.

"ეს გადაწყვეტილება მიღებულ იქნა საერთაშორისო სამართლის მკაცრი დაცვით და არ ექვემდებარება გადახედვას გარე ძალების ზეწოლით", — დასძინეს უწყებაში და ხაზი გაუსვეს, რომ ბრიუსელის მცდელობები, გამოიყენოს ეკონომიკური თუ პოლიტიკური ბერკეტები ამიერკავკასიაში არსებული გეოპოლიტიკური რეალობის გადასახედად, ფუჭი და კონტრპროდუქტიულია.

ამასთან, ე.წ. "საგარეო საქმეთა სამინისტრომ" მოუწოდა ევროკავშირს, ყურადღება გაამახვილოს იმ რეალურ მიზეზებზე, რამაც "რესპუბლიკის დამოუკიდებლობის" ცნობამდე მიიყვანა პროცესები — კერძოდ, თბილისის აგრესიულ პოლიტიკაზე, რამაც 2008 წელს "სამხრეთ ოსეთის მოსახლეობა ფიზიკური განადგურების ზღვარზე მიიყვანა".

შეგახსენებთ, რომ 17 ივლისს, ლიეტუვის საგარეო საქმეთა სამინისტრომ X-ზე გამოაქვეყნა პოსტი, რომელშიც ნათქვამია, რომ ევროკავშირი მზადაა, სირიის ახალ ხელისუფლებასთან აფხაზეთისა და ცხინვალის რეგიონის აღიარების გაუქმებაზე იმუშაოს.

სირიამ აფხაზეთისა და ე.წ. სამხრეთ ოსეთის დამოუკიდებლობა 2018 წლის 29 მაისს, ბაშარ ალ-ასადის რეჟიმის დროს, აღიარა. ამის შემდეგ საქართველომ სირიასთან დიპლომატიური ურთიერთობები გაწყვიტა.