ტელეკომპანია "ფორმულას" ჟურნალისტი ვახო სანაია საკუთარ სახლთან დააკავეს. სამართალდამცავები ვახო სანაიას სახლში განაჩენის გამოცხადებიდან დაახლოებით 2 საათში მივიდნენ. მანამდე იგი სახლის წინ, სადარბაზოსთან ელოდა როდის გამოჩნდებოდნენ სამართალდამცავები და როდის დაადებდნენ ხელბორკილს.

ჟურნალისტს სოციალურ ქსელში დაწერილი პოსტის გამო 14-დღიანი პატიმრობა დღეს შეუფარდეს. გადაწყვეტილება მოსამართლე ზვიად ცეკვავამ მიიღო. არც ვახო სანაია და არც მისი ადვოკატი პროცესს არ დასწრებიან.

განაჩენის გაგების შემდეგ, ჟურნალისტი "ტვ პირველთან" აცხადებდა, რომ მისთვის არანაირი მნიშვნელობა არ აქვს ე.წ. სასამართლო რა განაჩენს გამოიტანს, მას სიტყვის თქმას ვერავინ აუკრძალავს.

"ჩემთვის არანაირი მნიშვნელობა არა აქვს, ე.წ. სასამართლოს რა სხდომებს გამართავს. საერთოდ არ მაინტერესებს. წერონ და იკითხონ. მე მაინტერესებს ის, რომ მე დავწერ და წავიკითხავ იმას, რაც საჭიროდ მიმაჩნია. ეს იქნება ეთერში, ეს იქნება სოციალური ქსელებით... სიტყვის თქმას ვერავინ აგვიკრძალავს. ასე რომ, ამ სქროლვის სააგენტოს თუ სამმართველოს შეუძლია, გააგრძელოს თავისი ე.წ. მოღვაწეობა. სასამართლომ განიხილოს სხდომებზე, შემდეგ იქ მიტანილი სქრინები, ვურჩევდი, რომ ხმამაღლა წაიკითხონ ხოლმე, ასე უფრო საინტერესო იქნება ჩემი სტატუსები. არანაირი მნიშვნელობა ჩემთვის არ აქვს ჯარიმას დაწერს ე.წ. მოსამართლე, პატიმრობის გადაწყვეტილებას გამოაცხადებინებენ, თუ რაც იქნება. ჩემთვის ამას არ აქვს არანაირი მნიშვნელობა, ჩემს საქმიანობაში ეს არაფერს ცვლის, გინდა პატიმრობა იყოს, გინდ ჯარიმა", — ამბობს სანაია.

განაჩენის გაგების შემდეგ სანაიამ სოციალურ ქსელში კიდევ ერთი პოსტი დაწერა. ის საზოგადოებას მოუწოდებს, 14 დღე, სანამ ის საპატიმროში იქნება შალვა პაპუაშვილსა და ლადო ბოჟაძეს შეურაცხყოფა არ მიაყენონ.

"14 დღე *ლეები არ დაუძახოთ შალვა პაპუაშვილს და ლადო ბოჟაძეს. რომ გამოვალ, მე მივხედავ მაგ ამბავს," — დაწერა სანაიამ.