რატომ არის მნიშვნელოვანი: საერთაშორისო რესპუბლიკური ინსტიტუტის (IRI) ახალი საზოგადოებრივი აზრის კვლევა კიდევ ერთხელ აჩვენებს, რომ საქართველოს ევროკავშირში გაწევრიანებას მტკიცე მხარდაჭერა აქვს.

• გამოკითხულთა 89% სრულად ან მეტ-ნაკლებად უჭერს მხარს საქართველოს ევროკავშირში გაწევრიანებას — მხარდაჭერა, წინა კვლევასთან შედარებით, 4%-ით არის გაზრდილი და ისტორიულ მაქსიმუმს აღწევს.
• ამავდროულად, საქართველოს მოქალაქეები არ უჭერენ მხარს ქვეყანაში რუსეთის მოქალაქეების ყოფნას — გამოკითხულთა 79% წინააღმდეგია, მათ ბიზნესის რეგისტრაციის, ქონების შეძენის ან საქართველოში უვიზოდ შემოსვლის უფლება ჰქონდეთ.

ევროინტეგრაცია: გამოკითხულთა 75% მხარს უჭერს საქართველოს ევროკავშირში გაწევრიანებას, 14% კი გარკვეულწილად უჭერს მხარს.

• გარდა ამისა, 62% ამბობს, რომ მაინც დაუჭერდა მხარს ევროინტეგრაციას, თუ ეს რუსეთთან სავაჭრო ურთიერთობის გაწყვეტას გამოიწვევდა.
• მოსახლეობის აზრით, ყველაზე დიდი დაბრკოლება საქართველოს ევროკავშირში გაწევრიანების გზაზე პოლიტიკური არასტაბილურობა და ნაკისრი ვალდებულებების არშესრულებაა.
• მთავარი სარგებელი კი — ეკონომიკის გაძლიერება, უსაფრთხოება და ქვეყნის განვითარებაა.

NATO: ამავდროულად, 65% მხარს უჭერს ნატოში გაწევრიანებასაც, 15% კი გარკვეულწილად უჭერს მხარს.

• უმრავლესობის აზრით, ალიანსის წევრობის მთავარი სარგებელი უსაფრთხოება და დაცვაა, მთავარი დაბრკოლება კი — რუსეთს წინააღმდეგობა და ოკუპირებული ტერიტორიების სტატუსი.
• მოსახლეობის 50% პასუხობს, რომ ქვეყნის კურსი მხოლოდ პროევროპული დასავლური უნდა იყოს;
• 32%-ის აზრით კი — პროდასავლური, მაგრამ რუსეთთან ურთიერთობა უნდა გაგრძელდეს;
• მხოლოდ 9 პროცენტი საუბრობს პრორუსულ კურსზე.

პარტნიორები: ქვეყნის ყველაზე მნიშვნელოვან პოლიტიკურ პარტნიორად 63% ევროკავშირს ასახელებს.

• 47% — აშშ-ს, 27% — უკრაინას, 18% — თურქეთს, 16% — აზერბაიჯანს, 12% — გაერთიანებულ სამეფოს, 8% კი — რუსეთს.
• ყველაზე დიდ პოლიტიკურ საფრთხედ უმრავლესობა, 87% რუსეთს მიიჩნევს, 8% კი აშშ-ს და თურქეთს.
• გამოკითხულთათვის ყველაზე მნიშვნელოვან ეკონომიკურ პარტნიორებშიც ევროკავშირი, აშშ და თურქეთი ლიდერობენ — რუსეთი 12%-ით მე-6 ადგილზეა.
• ანალოგიურად, ეკონომიკურად ყველაზე საფრთხისშემცველადაც 76%-ით რუსეთი ლიდერობს, მეორე ადგილზე კი 6%-ით თურქეთია.

რუსეთი: კვლევის მიხედვით, მოსახლეობის 34% მკაცრად ეწინააღმდეგება რუსეთთან დიალოგს, სრულიად მომხრე 26%-ა, გარკვეულწილად მომხრე კი — 27%.

• 30% ძალიან უარყოფითად აფასებს ხელისუფლების ურთიერთობას რუსეთთან, 20% — გარკვეულწილად უარყოფითად, 10% — ძალიან დადებითად, 30% — კი გარკვეულწილად დადებითად.
• მხოლოდ 17% ფიქრობს, რომ ახლანდელი ხელისუფლების საგარეო კურსი პროდასავლურია, 21%-ის აზრით კი — ის უფრო პროდასავლურია, ვიდრე პრორუსული.
• 25% ფიქრობს, რომ ქართული ოცნების კურსი პრორუსულია, 20% კი ფიქრობს — უფრო პრორუსულია, ვიდრე პროდასავლური.
• მოსახლეობის 76% ფიქრობს, რომ რუსეთის აგრესია საქართველოს მიმართ ისევ გრძელდება.
• 37% ფიქრობს, რომ რუსები ვერ უნდა შემოდიოდნენ საქართველოში, სანამ არ დაგვიბრუნებენ ოკუპირებულ ტერიტორიებს; გამოკითხულთა 29%-ს კი ურჩევნია, რომ მათ ქვეყანა დატოვონ.
• 23% მხარს უჭერს რუსეთთან ფრენების აღდგენას, 34% კი — წინააღმდეგია.

მეთოდოლოგია: IRI-ის ინფორმაციით, კვლევა ჩატარდა 2023 წლის 4-23 მარტის პერიოდში საერთაშორისო რესპუბლიკური ინსტიტუტის კვლევების ცენტრის სახელით, ბალტიის კვლევებისა და გელაპის ორგანიზაციის წარმომადგენლის დოქტორი რასა ალიშაუსკინეს მიერ.

• საველე სამუშაოები ჩატარდა IPM-ის მიერ, მონაცემები შეგროვდა პირისპირ ინტერვიუს გზით.
• შერჩევა მოიცავდა საარჩევნო ხმის უფლებისა და ასაკის მქონე 1 500 რესპონდენტს.
• მონაცემები შეწონილ იქნა ასაკის, სქესის, რეგიონისა და დასახლების ზომის შესაბამისად.
• ცდომილების ზღვარი წარმოადგენს +/- 2.5 %, გამოპასუხების მაჩვენებელი — 63%.
• კვლევის განხორციელება შესაძლებელი გახდა ამერიკელი ხალხის მხარდაჭერით, აშშ-ის საერთაშორისო განვითარების სააგენტოს მეშვეობით.