TDI დეპუტატ ტარიელ ნაკაიძე თავდასხმას ეხმაურება.

რატომ არის მნიშვნელოვანი: 22 მარტს, პარლამენტის პლენარულ სხდომათა დარბაზში ანტიდასავლური, პრორუსული და ქართული ოცნებისგან ფორმალურად გამიჯნული ხალხის ძალის დეპუტატმა, ვიქტორ ჯაფარიძემ ოპოზიციონერ ტარიელ ნაკაიძეს მიკროფონი ჩაარტყა.

  • On.ge-სთან საუბარში ნაკაიძემ თქვა, რომ პრორუსი დეპუტატები მას აგენტს უწოდებდნენ, საპასუხოდ კი ის განმარტებას ითხოვდა და ეუბნებოდა, თავად იყვნენ რუსული კანონის მიმღები მოღალატეები.
  • "არგუმენტების არქონამ პოლიტიკაში ამ ძალადობამდე მიიყვანა. გაუნათლებელია, ხსნი მიკროფონს და გირტყამს. არ აქვს არგუმენტი, რომ გესაუბროს", — ამბობს ნაკაიძე ჯაფარიძეზე.
  • ქართული ოცნების თავმჯდომარემ, ირაკლი კობახიძემ ოპოზიციონერი დეპუტატი ტარიელ ნაკაიძე "მძიმე წარსულში" დაადანაშაულა.
  • ქართული ოცნებიდან ფორმალურად წასულ, ანტიდასავლური მოძრაობის ერთ-ერთ წევრს, არჩილ ბერაიას ჰგონია, რომ ნაკაიძისთვის მიკროფონის ჩარტყმა ძალადობა არ არის.

დეტალები: ორგანიზაციის შეფასებით, ხელისუფლების წარმომადგენლების მიმართ ნაკაიძეზე შეტევა მიზანმიმართული და ორკესტრირებულია და ის სიძულვილსა და ძალადობას აქეზებს.

  • "იგი მიმართულია არამხოლოდ ბატონი ტარიელის, არამედ ყველა იმ დისკრიმინირებული ადამიანის წინააღმდეგ, რომელთა უფლებებს ის წლებია პრინციპულად იცავს".
  • TDI-ში აღნიშნავენ, რომ ნაკაიძე წლებია, რელიგიის თავისუფლების, თანასწორობის, რელიგიური და ეთნიკური უფლებების დასაცავად იბრძვის და გაბედულად საუბრობს, არა მხოლოდ მუსლიმი თემის, არამედ ყველა ჩაგრული ჯგუფის უფლებებზე.
  • "დღესაც ტარიელ ნაკაიძე, დეპუტატის რანგში, ხშირად საუბრობს ქვეყანაში სხვადასხვა დისკრიმინირებული ჯგუფის სახელით, დგას რელიგიისა და რწმენის თავისუფლების, ზოგადად, ადამიანის უფლებების დაცვის სადარაჯოზე".

გარდა ამისა, მიუთითებენ, რომ საქართველოში მუსლიმები წლების განმავლობაში სისტემური დისკრიმინაციის წინაშე დგანან და დევნას განიცდიან — მათ ხშირად ეზღუდებათ რელიგიისა და რწმენის თავისუფლება.

  • ნათქვამია, რომ სახელმწიფო მათ საჭიროებებს არა უფლებების დაცვის, არამედ მოჩვენებითი უსაფრთხოების კონტექსტში განიხილავს.
  • "სახელმწიფოს ამგვარი პოლიტიკა იწვევს საზოგადოებრივი ჯგუფების გარიყვას, უნდობლობას, აღრმავებს დისკრიმინაციას და აზიანებს ტოლერანტული გარემოს".
  • "ხელისუფლების მიერ უფლებადამცველების, განსხვავებული რელიგიისა თუ უმცირესობის ჯგუფის წარმომადგენლების დისკრედიტაცია და "აგენტებთან" გაიგივება, აღვივებს შუღლს, აქეზებს ძალადობას და მიზანმიმართულად აშორებს საქართველოს ევროპული ინტეგრაციისგან", — აღნიშნავენ TDI-ში.