საქართველოს ვიზალიბერალიზაციის საკითხთან დაკავშირებით სახელმწიფო მინისტრი ევროპულ და ევროატლანტიკურ სტუქტურებში ინტეგრაციის საკითხებში, დავით ბაქრაძე ამბობს, რომ საქართველოს ჯერ კიდევ იმედი აქვს, რომ საქართველოს ევროკავშირთან უვიზოდ მიმოსვლის საკითხს ევროკავშირის ყოველ მომდევნო სხდომაზე განიხილავენ:

"რა თქმა უნდა, ისე, როგორც ეს ევროკომისიის მიერ გაცხადდა, ჩვენ ველოდებით, რომ პოზიტიურ გადაწყვეტილებას სწორედ მათ მიერ განსაზღვრულ პერიოდში მიიღებენ. როგორც მოგეხსენებათ, ამჯერად პრეზიდენტი მიემგზავრება. ჩვენ გვექნება შეხვედრები, როგორც ევროპარლამენტში, ისე ევროკომისიაში და ევროსაბჭოში მის პრეზიდენტთან".

ერთიანი ნაციონალური მოძრაობის წევრი, სერგო კაპანაძე კი განმარტავს, რომ თავისთავად საიმიგრაციო კრიზისი ხელს უწყობს ცუდი გარემოს შექმნას:

"ყველაზე მთავარი ამაზე დამატებული არის ის, რომ დღეს აღარ არის ისეთი ხელსაყრელი მდგომარეობა, რომ ჩვენ მოვახერხოთ ჩვენი ამ ინტერესის ლობირება, რადგან გვაქვს სხვა პრობლემები, როგორიც არის რუსთავი 2-ის საქმე და მედიის თავისუფლება, პოლიტიკური დევნა, კორცხელი და ა.შ".

თავისუფალი დემოკრატების წევრი, ირაკლი ჩიქოვანი ამბობს, რომ ძალიან ბევრი საგარეო ფაქტორია, რომელიც საქართველოზე არ არის დამოკიდებული, რამაც შესაძლოა ნეგატიურად იმოქმედოს ვიზალიბერალიზაციის გეგმასთან დაკავშირებით:

"მაგრამ მიმაჩნია, რომ ჩვენ აბსოლუტურად ყველაფერი უნდა გავაკეთოთ იმისთვის, რომ, პირველ რიგში, ვანახოთ კონსოლიდაცია ქვეყნის შიგნით, რომ ეს გადაწყვეტილება არის აუცილებელი და უმნიშვნელოვანესი".

1 ივნისს ევროკავშირმა საქართველოსთვის უვიზო მიმოსვლის დამტკიცების პროცესი დროებით შეაფერხა.

EU-ს ვებგვერდზე გამოქვეყნებული ინფორმაციის თანახმად კი, 6 ივნისს საგარეო ურთიერთობათა კომიტეტზე ერვოკავშირისა და საქართველოს ურთიერთობის გარდა ვიზალიბერალიზაციის თემასაც განიხილავენ. სტრასბურგში გამართულ კომიტეტის სხდომას დაესწრება საქართველოს პრეზიდენტი გიორგი მარგველაშვილი და ევროკავშირის კომისარი იოჰანეს ჰანიც.