ამის შესახებ ვლადიმერ პუტინმა ფედერალური კრებისადმი ყოველწლიურ მიმართვაზე ისაუბრა.

რატომ არის მნიშვნელოვანი: სტრატეგიული შეიარაღების შემცირებისა და შეზღუდვის შეთანხმება, იგივე New START, რუსეთმა აშშ-სთან 2010 წელს გააფორმა და მისი ვადა 2026 წლის 4 თებერვალს იწურება.

  • ეს ერთადერთი შეთანხმებაა, რომელიც ბირთვული იარაღის, მათ შორის, კონტინენტთაშორისი ბალისტიკური რაკეტის (ICBM), წყალქვეშა ნავიდან გასაშვები ბალისტიკური რაკეტისა (SLBM) და ბირთვული შეიარაღებისთვის განკუთვნილი მძიმე ბომბდამშენების განთავსების საკითხებს არეგულირებს.

დეტალები: პუტინის განცხადებით, აშშ NATO-ს საშუალებით რუსეთს ულტიმატუმებს უყენებდა და შეთანხმების პუნქტების შესრულებას აიძულებდა, თვითონ კი თავის ნებაზე იქცეოდა.

  • კრემლის ლიდერი ხაზს უსვამს, რომ არ გამოდიან შეთანხმებიდან, არამედ აჩერებენ მასში მონაწილეობას.
  • "სანამ დისკუსიას დავუბრუნდებით, უნდა გვესმოდეს, რაზე აქვთ პრეტენზია ისეთ ქვეყნებს, როგორებიცაა საფრანგეთი და დიდი ბრიტანეთი და როგორ გავითვალისწინებთ მათ სტრატეგიულ არსენალს, ანუ ალიანსის ერთობლივი დარტყმის პოტენციალს", — თქვა პუტინმა.
  • მისივე მტკიცებით, ვაშინგტონში "ზოგიერთი ფიგურა" ბირთვული იარაღის გამოცდაზე ფიქრობს.
  • პუტინი იმუქრება, რომ ამ შემთხვევაში რუსეთიც იმუშავებს ბირთვული იარაღის განვითარებაზე.