კორპორაციული მართვის კოდექსის დამტკიცების შედეგად, ქალთა წილი სამეთვალყურეო საბჭოში 21%-ით გაიზარდა.

კობა გვენეტაძემ საბანკო სექტორისა და საერთაშორისო საფინანსო ორგანიზაციების ქალ წარმომადგენლებთან შეხვედრა გამართა. ეროვნული ბანკის პრეზიდენტმა კორპორაციულ მართვაში ქალთა როლის მნიშვნელობაზე ისაუბრა და ამ მიმართულებით, სებ-ის მიერ განხორციელებულ ნაბიჯებზე გაამახვილა ყურადღება.

კობა გვენეტაძემ ქალების როლის ზრდასთან დაკავშირებულ ინიციატივებსა და ამ მიმართულებით განხორციელებულ ნაბიჯებზეც ილაპარაკა. მან შეხვედრის მონაწილეებს დეტალურად გააცნო, თუ რა შედეგები მოიტანა კორპორაციული მართვის კოდექსის ამოქმედებამ და მათი შეფასებებიც მოისმინა.

ეროვნული ბანკის პრეზედენტმა, ასევე, მიმოიხილა სხვადასხვა საერთაშორისო ორგანიზაციის პრაქტიკა, გენდერული სტატისტიკა და ქალების თანაბარი ჩართულობის მნიშვნელობას გაუსვა ხაზი. კობა გვენეტაძემ აღნიშნა, რომ არაერთი ქვეყნის გამოცდილებით, როდესაც სამეთვალყურეო საბჭოს წევრები ქალები არიან, მცირდება რისკის შემცველი გადაწვეტილებების რაოდენობა, უმჯობესდება სესხებთან დაკავშირებული შედეგები და ბანკებს აქვთ მოგების უკეთესი მაჩვენებელი.

"კორპორაციული მართვის კოდექსი, რომელიც სხვა არაერთი მნიშვნელოვანი საკითხის მოწესრიგებასთან ერთად, ბანკის მართვის პროცესში ქალების როლის გაძლიერებას ითვალისწინებს განსაკუთრებით მნიშვნელოვანია საქართველოს ეროვნული ბანკისთვის", — განაცხადა კობა გვენეტაძემ.

უკვე ხუთ წელზე მეტია, რაც საქართველოს ეროვნულმა ბანკმა კომერციული ბანკებისთვის პირველი კორპორაციული მართვის კოდექსი დაამტკიცა. კორპორაციული მართვის კოდექსი იყო პირველი რეგულაცია საქართველოში, რომელმაც გენდერული კვოტა დააწესა. აღნიშნული რეგულაციის თანახმად, სამეთვალყურეო საბჭოების წარმომადგენლების მინიმუმ 20 % უნდა ყოფილი განსხვავებული სქესის წარმომადგენელი. დღევანდელი მონაცემებით, მაჩვენებელი 30 %-ს აღწევს და სამომავლოდ დაგეგმილია მისი 40 %-მდე ზრდა.