ამის შესახებ საერთაშორისო გამჭვირვალობა — საქართველომ კიდევ ერთი კვლევა გამოაქვეყნა.

რატომ არის მნიშვნელოვანი: კვლევის მიხედვით, 2022 წლის 1 იანვრიდან 30 სექტემბრის ჩათვლით ყველა პარტიამ ჯამში 1 944 073 ლარის ოდენობის შემოწირულება მიიღო.

  • აქედან 666 000 ლარი (34%) მმართველმა პარტიამ, 393 611 — ალტ-ინფომ, ხოლო 370 600 ლარის შემოწირულობა ლელომ მიიღო.
  • TI ამბობს, რომ ქართულ ოცნებას თანხების აბსოლუტური უმრავლესობა ბიძინა ივანიშვილთან ან მმართველ პარტიასთან დაახლოებულმა მსხვილმა ბიზნესჯგუფებმა შესწირეს.

ფოტო: საერთაშორისო გამჭვირვალობა - საქართველო

ქართულ ოცნებას ერთ და იმავე დღეს ჯამში 100 000 ლარი ნოშრევან ნამორაძემ და მისმა მეუღლემ, ნინო სუთიძემ შესწირეს. ორგანიზაციის თქმით, ნამორაძე ხელისუფლებასთან დაახლოებული ბიზნესმენია, რომელიც სამშენებლო ბიზნესს ეწევა.

  • როგორც TI მიუთითებს, ნოშრევან ნამორაძეს და ნინო სუთიძეს წარსულში ქართული ოცნებისთვის 170 000 ლარი აქვთ შეწირული.
  • ასევე, ნათქვამია, რომ თამაზ თამაზაშვილმა, ირაკლი ღარიბაშვილის სიმამრმა ქართულ ოცნებას 10 000 ლარი შესწირა. გასულ წლებში მას 12-ჯერ აქვს მმართველი პარტიის სასარგებლო შემოწირულება გაღებული, ჯამში — 57 185 ლარი.

ფოტო: საერთაშორისო გამჭვირვალობა — საქართველო

ასევე, კვლევაში ვკითხულობთ, რომ მიმდინარე წლის 28 და 29 აპრილს ჯამში 150 000 ლარი შესწირეს ქართულ ოცნებას მუხრან, თეონა და ლაშა ბაგრატიონებმა, რომლებიც გამჭვირვალობა საქართველოს თქმით, ერთმანეთთან სხვადასხვა ფორმით არიან დაკავშირებული.

  • ზურაბ ძაგნიძემ და ირაკლი შატაკიშვილმა ერთ და იმავე დღეს ჯამურად 100 000 ლარი შესწირეს ქართულ ოცნებას.
  • ისინი ა(ა)იპ რუსთაველების გამგეობის წევრები არიან.
  • ირაკლი შატაკიშვილი 2022 წლის აპრილიდან ქართული ოცნების მაჟორიტარი დეპუტატია პარლამენტში რუსთავი-გარდაბნის ოლქიდან.

სხვა პარტიები: კვლევის მიხედვით, ამ პერიოდში ერთიან ნაციონალურ მოძრაობას 212 907 ლარი შესწირეს.

  • ევროპულ საქართველოს — 130 484 ლარი, ხოლო, დროას — 63 927 ლარი.
  • რაც შეეხება ალტ-ინფოს, ორგანიზაციის ცნობით, 2022 წლის იანვარში საქალაქო სასამართლომ თანხების არასწორი დეკლარირებისა და არაფულადი შემოწირულობების დამალვისთვის კონსერვატიული მოძრაობა 217 ათასი ლარით დააჯარიმა.