ომბუდსმენობის კანდიდატი ნაზი ჯანეზაშვილი აცხადებს, რომ პარლამენტში კანდიდატებთან გასაუბრების პროცესი ინტერესთა კონფლიქტით მიმდინარეობს.

რატომ არის მნიშვნელოვანი: სახალხო დამცველობის ერთ-ერთი კანდიდატი, პარტია გირჩის ლიდერი იაგო ხვიჩია პარლამენტში ომბუდსმენობის სხვა კანდიდატებს უსვამს კითხვებს.

  • ჯანეზაშვილი თვლის, რომ ეს ინტერესთა კონფლიქტია და ხვიჩიას თვითაცილების საკითხი უნდა დაეყენებინა.
  • ჯანეზაშვილი ერთ-ერთია იმ სამ კანდიდატს შორის, რომელიც არასამთავრობო ორგანიზაციებმა სახალხო დამცველობის კანდიდატებად წარადგინეს.

დეტალები: ომბუდსმენობის კანდიდატის განცხადებით, გუშინ საღამოს მან და სხვა კანდიდატებმა მიიღეს შეთავაზება, მივიდნენ იაგო ხვიჩიას გასაუბრებაზე და დაუსვან მას შეკითხვები.

  • "ეს არის აბსოლუტურად მიუღებელი, აშკარაა, რომ პარლამენტის მოქმედ წევრს აყენებენ პრივილეგირებულ მდგომარეობაში;
  • ერთის მხრივ ის მონაწილეობდა სხვების გასაუბრებაში, სვამდა კითხვებს და ამავდროულად, მის გასაუბრებაშიც სრულიად განსხვავებულ რეჟიმს გვთავაზობენ.
  • ეს დამოკიდებულება არ არის მიზანშეწონილი, უნდობლობას იწვევს და ეჭვს აჩენს, რა თქმა უნდა, საზოგადოებაში, თუ რატომ არის ორმაგი სტანდარტი", — ამბობს ჯანეზაშვილი.

გარდა ამისა, ნაზი ჯანეზაშვილი საკუთარ კანდიდატურას არ ხსნის, თუმცა ადამიანის უფლებათა დაცვისა და სამოქალაქო ინტეგრაციის კომიტეტზე გასაუბრებაში მონაწილეობას არ აპირებს.

  • ჯანეზაშვილი აღნიშნავს, რომ გასაუბრების პროცესში კანდიდატებისთვის ახსნა-განმარტების მოთხოვნა იმის გამო, რომ წარსულში მათ ხელისუფლების მიმართ კრიტიკული განცხადებები აქვთ გაკეთებული, გასაუბრებების საფუძველზე კანდიდატების შერჩევას არ ემსახურება.