რუსული პროპაგანდისტული მედიის ცნობით, პუტინის პრესმდივანმა ასე უპასუხა ჟურნალისტების შეკითხვას, გავრცელდება თუ არა რუსეთის "ბირთვული ქოლგა" ანექსირებულ ტერიტორიებზე.

რატომ არის მნიშვნელოვანი: 30 სექტემბერს პუტინმა ხელი მოაწერა ბრძანებას, რომლითაც უკრაინის ტერიტორიები — დონეცკის, ლუგანსკისა, ხერსონისა და ზაპოროჟიეს ოლქები, რუსეთს "მიუერთა".

  • ამ რეგიონების ანექსიაზე საუბრისას, კრემლი მუდმივად იმუქრება, რომ რუსეთის ფედერაცია "ახალ ტერიტორიებს" ყველა შესაძლო გზით დაიცავს.
  • რუსეთი ამბობს, რომ დაცვისთვის გამოყენებული იქნება, არა მხოლოდ სამობილიზაციო შესაძლებლობები, არამედ ნებისმიერი რუსული იარაღი, მათ შორის, სტრატეგიული ბირთვული და ახალ პრინციპებზე დაფუძნებული იარაღები.
  • კრემლის პრესსპიკერმა და უშიშროების საბჭოს ხელმძღვანელის მოადგილემ, ექსპრეზიდენტმა დმიტრი მედვედევმაც თქვა, რომ "შეერთების" შემდეგ რუსეთი ამ ტერიტორიებს თავისად განიხილავს და მათზე თავდასხმისას, თავს უფლებას აძლევს, გამოიყენოს ყველა სახის იარაღი, მათ შორის, ბირთვულიც.

დეტალები: "მიმდინარეობს მუშაობა ახალი ტერიტორიების ინტეგრაციაზე რუსეთის ფედერაციის სამართლებრივ სისტემაში, უსაფრთხოების, სოციალურ, ეკონომიკურ სისტემებში და ა.შ. მაგრამ ყველა ეს ტერიტორია რუსეთის ფედერაციის განუყოფელი ნაწილია", — თქვა პესკოვმა.

  • მისივე თქმით, ამ ტერიტორიებზე უსაფრთხოება უზრუნველყოფილი იქნება ისევე, როგორც რუსეთის სხვა რეგიონებში.

რუსეთის მუქარაზე გაეროში ისაუბრა აშშ-ს პრეზიდენტმა.

  • ბაიდენმა გენერალური ასამბლეის 77-ე სესიაზე პუტინი უკრაინაში ომის დაწყების გამო გააკრიტიკა და თქვა, რომ ბირთვულ ომს ვერავინ მოიგებს.
  • "არ მგონია, რომ ამას გააკეთებს. ვფიქრობ, მისი მხრიდან უპასუხისმგებლობა ამაზე საუბარი", — განაცხადა ბაიდენმა.
  • უკრაინის პრეზიდენტი კი ამბობს, რომ ბირთვული იარაღის გამოყენების შემთხვევაში, პუტინი ვერც საკუთარი სიცოცხლის გადარჩენას შეძლებს.
  • "მე მჯერა, რომ რუსეთის ლიდერს ძალიან უყვარს საკუთარი სიცოცხლე და ვფიქრობ, ესმის, რომ ბირთვული იარაღის გამოყენების შემდეგ, ის თავისი სიცოცხლის გადარჩენას ვეღარ შეძლებს. ამაში დარწმუნებული ვარ", — განაცხადა ვოლოდიმირ ზელენსკიმ