1997 წელს სამყარომ პირველად გაიცნო ბიჭი, რომელიც გადარჩა — წიგნით ჰარი პოტერი და ფილოსოფიური ქვა. მას შემდეგ ჰარი პოტერის წიგნებისა და ფილმების სერიამ უამრავი ადამიანის ცხოვრება შეცვალა. ამბავი სიკეთის, მეგობრობისა და გამბედაობისა შესახებ დღესაც აგრძელებს მთელ მსოფლიოში მკითხველების მოჯადოებას.

რა არის Back to Hogwarts?

დაბრუნება ჰოგვორტსში შეიძლება ნიშნავდეს ყველაფერს, რაც ჰარი პოტერთან დაკავშირებულ ემოციებს გაგიღვიძებთ: ეს შეიძლება იყოს საყვარელი წიგნების ხელახლა გადაკითხვა, ჯადოქრულ ღონისძიებებზე დასწრება, ფილმების ყურება, თემატური შეხვედრები, ქვიზების შევსება იმის გასაგებად, ჰოგვორტსის რომელი პროფესორი ხარ, შეჯიბრებები და ა.შ

Wizarding World-ის საერთაშორისო პლატფორმის ინიციატივით, ყოველი წლის პირველ სექტემბერს ჰარი პოტერთან დაკავშირებული მარათონი იწყება. ამ დღეს, ფანები მთელი მსოფლიოდან ბრიტანეთში, კინგს კროსის სადგურზე იკრიბებიან. ღონისძიებები როგორც რეალურ, ისე ვირტუალურ სამყაროში იმართება. წელს კი მასშტაბურ ფესტივალს საქართველოც უერთდება.

როგორ აღვნიშნო ჰოგვორტსში დაბრუნება საქართველოში?

ჰარი პოტერის თავგადასავლები პირველად საქართველოში სულაკაურის გამომცემლობამ დაბეჭდა. გამომცემლობის ისტორია ამ წარმატებულ პროექტთან მჭიდროდაა გადაჯაჭვული.

ჰარი პოტერის ქართველ ფანებს, ჯოან როულინგის სამყაროს მაგიას წელს სულაკაურის გამომცემლობა ახალგაზრდულ ლიტერატურულ კლუბთან ბიბლიოფილებთან კოლაბორაციით გაუზიარებს. პროექტის საერთაშორისო მხარდამჭერები არიან Wizarding World და Harry Potter Fan Club.

24-25 სექტემბერს პროექტი ოფიციალურად გაიხსნება და ღონისძიებების სერიას გააერთიანებს. ორი ჯადოქრული დღის განმავლობაში ბიბლიოფილში გაწევრიანებულ მკითხველებს საშუალება ექნებათ, ისარგებლონ სულაკაურის გამომცემლობის საგანგებო ფასდაკლებით ჰარი პოტერის წიგნებზე.

ინიციატივის ფარგლებში დაგეგმილია ორი გრანდიოზული შეჯიბრი: სამი ჯადოქრის ტურნირი და მაგიური წიგნების თარო.

მარათონის ფარგლებში გაიმართება შეხვედრები მთარგმნელებთან და ჰარი პოტერზე უზომოდ შეყვარებულ სპიკერებთან. ლიტერატურული კლუბის ფეისბუქ ჯგუფში კი საფესტივალო დღეების განმავლობაში ნახავთ ინტერაქტიულ პოსტებს, ქვიზებს, ინფორმაციას საერთაშორისო ღონისძიებების შესახებ და სხვა უამრავ გასართობს.