რუსული და უკრაინული მედიები ადგილობრივებზე დაყრდნობით წერენ, რომ ყირიმში, სიმფორაპოლის სამხედრო ავიაბაზაზე აფეთქებების ხმა ისმოდა.

დეტალები: ჯერ ოფიციალური ინფორმაცია არ გავრცლებულა, თუმცა როგორც რუსული კომერსანტი ამბობს, არსებობს მოსაზრება, რომ ავიადრომზე იარაღის საწყობი პატარა უპილოტო საფრენი აპარატით დაიბომბა.

  • გამოცემა ყირიმის ამბები კი წერს, რომ აფეთქებების ხმა დილით იყო და ახლა ტერიტორიაზე სიმშვიდეა.
  • მედუზას ინფორმაციით, აფეთქებები მოხდა გვარდეისკოეს სამხედრო აეროდრომზე, სადაც 2014 წლიდან ბაზირებულია რუსეთის თავდაცვის სამინისტროს შერეული საავიაციო პოლკი.
  • Bellingcat-ის ხელმძღვანელი კი ამბობს, რომ ამ ბაზაზე განთავსებული იყო 12 SU-24M და 12 SU-25SM და ინტეგრირებული იყო რუსეთის საზღვაო ძალებთან.
  • მედიებსა და ტელეგრამებზე ვრცელდება Maxar-ის ფოტოები, რომლებიც აეროდრომზე აფეთქებამდე არის გადაღებული და სხვადასხვა საფრენი აპარატი ჩანს — გადაღების ზუსტი დრო უცნობია.

ფოტო: Maxar Technologies

რატომ არის მნიშვნელოვანი: დღეს ეს უკვე მეორე აფეთქებაა ოკუპირებული ყირიმის სამხედრო ბაზებზე.

  • როგორც სუსპილნე წერს, დილას ჯანკოიას რაიონში ერთდროულად ორი ინციდენტი მოხდა: ხანკოიაში სატრანსფორმატორო ქვესადგურში ხანძარი და სოფელ მაისკეში საბრძოლო მასალის საწყობში აფეთქება.
  • რამდენიმე დღით ადრე კი აფეთქება იყო ყირიმის კიდევ ერთ სამხედრო ავიადრომზე, რის შედეგადაც 9 თვითმფრინავი განადგურდა.

ოფიციალურად უკრაინას არცერთ ინდიდენტში თავისი მონაწილეობა არ დაუდასტურებია, თუმცა ირიბად ამისკენ მიანიშნეს.

  • თავის მხრივ რუსეთი ცდილობს ეს არა უკრაინის შეტევად, არამედ უბედურ შემთხვევად წარმოაჩინოს.
  • მაგალიათად: როგორც კრემლისტური მედია რია აცხადებს, რუსეთის თავდაცვის სამინისტრომ მაისკისში მომხდარი აფეთქებები დაადასტურა, თუმცა განაცხადა, რომ აფეთქება სამხედრო ნაწილში ხანძრის გამო მოხდა.