ეს განცხადება საქართველოს პარლამენტის თავმჯდომარემ, შალვა პაპუაშვილმა გააკეთა.

რატომ არის მნიშვნელოვანი: დეოლიგარქიზაცია ევროკომისიის რეკომენდაციების ერთ-ერთი პუნქტია.

  • სწორედ ამ 12 პუნქტის შესრულებაზეა დამოკიდებული მიიღებს თუ არა საქართველო ევროკავშირის კანდიდატი ქვეყნის სტატუსს.

დეტალები: პაპუაშვილის თქმით, პოლიტიკურ პარტიებთან შეხვედრაზე განიხილეს უკრაინული კანონის პრინციპები და კრიტერიუმები.

  • "რა თქმა უნდა, აქვს უპირატესობა იმ კუთხით, რომ ის მოწყვეტილია ქართულ, პოლიტიკურ სუბიექტივიზმს და ჩვენ ვხედავთ, რომ სამწუხაროდ, ამ ტერმინმა გამოიწვია მხოლოდ ინსტრუმენტალიზირება საქართველოს შიდა პოლიტიკაში";
  • "აქედან გამომდინარე, კიდევ უფრო გააღრმავა რადიკალური ჯგუფების მხრიდან პოლიტიკაში დესტრუქციის შემოტანის სურვილი";
  • "ამ კანონის გადმოღება იქნებოდა, შეიძლება იყოს იმ კუთხით კარგი, რომ არ გამოიწვიოს რაიმე ურთიერთბრალდებები, რომ კანონი ვიღაცას ერგება ან არ ერგება".

პაპუაშვილის თქმით, ევროკომისიის რეკომენდაციების მუშაობას დღესაც "თავი აარიდეს" ნაციონალურმა მოძრაობამ, ასევე, ლელომ და სტრატეგია აღმაშენებელმა.

რა წერია უკრაინულ კანონში: უკრაინული კანონმდებლობის თანახმად, ოლიგარქი არის პირი, რომელიც ერთდროულად აკმაყოფილებს რამდენიმე მახასიათებელს.

  • მათ შორის, მონაწილეობს პოლიტიკურ ცხოვრებაში და აქვს მნიშვნელოვანი გავლენა მედიაზე;
  • არის საბოლოო მესაკუთრე ეკონომიკური სუბიექტისა, რომელიც ამ კანონის ამოქმედების დღიდან არის ბუნებრივი მონოპოლი ან ფლობს მონოპოლიურ (დომინანტურ) პოზიციას ბაზარზე "ეკონომიკური კონკურენციის დაცვის შესახებ" კანონის შესაბამისად და ზედიზედ ერთი წლის განმავლობაში ინარჩუნებს ან აძლიერებს ასეთ პოზიციას;
  • პირის და იმ ბიზნესსუბიექტების, რომელთა მოსარგებლეც ის არის, აქტივების ჯამური ღირებულება აჭარბებს შრომისუნარიანი პირებისთვის დადგენილი საარსებო მინიმუმის მილიონზე ნამრავლს.