"შრომის ინსპექცია შექმნილია, შესაძლოა, გასააქტიურებელიც იყოს," - ეს განცხადება საქართველოს პრემიერ-მინისტრმა, გიორგი კვირიკაშვილმა ტყიბულში გააკეთა, სადაც მინდელის შახტში დაღუპული მეშახტეების ოჯახებს მიუსამძიმრა.

კვირიკაშვილის თქმით, "ამ კონკრეტულ შემთხვევაში საქმე ეხება ტექნიკური ზედამხედველობის საკითხებს. ეს საკითხებიც განსაკუთრებულ კონტროლზეა აყვანილი."

9 მაისს, ტყიბულში, ოთხი მუშა 400 მეტრის სიმაღლის შახტში ჩავარდა. გარდაცვლილთა ცხედრების ამოყვანა მეორე დღეს მოხდა.

სამუშაო ადგილებზე 2011-2016 წლებში მომხდარი ტრაგიკული შემთხვევების შედეგად 270 ადამიანი დაიღუპა და 776 დაშავდა. სხვადასხვა მემარცხენე ჯგუფები უკვე წლებია მოითხოვენ ქმედითი შრომის ინსპექციის შექმნას, რომელიც, მათი რწმენით, აღნიშნულ სტატისტიკას შეამცირებს და შრომის პირობების გაუმჯობესებას შეუწყობს ხელს.