ოკუპანტები დონბასში უწყვეტ ბრძოლებს აწარმოებენ. ამის ფონზე, უკრაინელი სამხედროები არა მხოლოდ თავს იცავენ, არამედ გარკვეულ ტერიტორიებზე წინ მიიწევენ.

რატომ არის მნიშვნელოვანი: დღეს რუსული საოკუპაციო ძალები მთლიანად კონცენტრირებულები არიან დონბასში, სადაც მობილიზებული აქვთ მაქსიმალური არტილერია და რეზერვები.

  • ოკუპანტების ერთ-ერთი მთავარი ამოცანაა, სრულად დაამყარონ კონტროლი დონბასზე, რაც საშუალებას მისცემთ ყირიმის მიმართულებით სახმელეთო დერეფანი შექმნან.

დეტალები: გაერთიანებული ძალების დაჯგუფების ცნობით, უკრაინის შეიარაღებულმა ძალებმა დონბასში სამი სოფელი გაათავისუფლეს, რის შედეგადაც, ფრონტის ხაზი 15 კილომეტრით გადაწიეს.

  • "ფრონტის ხაზზე მტრის არტილერია ერთი წუთითაც არ ჩერდება. მაგრამ მტრის რიცხობრივი უპირატესობა არ ნიშნავს, რომ რაშისტები დაუსჯელები დარჩებიან";
  • "თითოეული ჩვენი საპასუხო დარტყმა მნიშვნელოვან ზარალს აყენებს დამპყრობლებს".

კონტექსტი: ვითარება ყველაზე მეტად დაძაბულია სევეროდონეცკში, სადაც ვოლოდიმირ ზელენსკის თქმით, დონბასის ბედი წყდება.

  • ბრიტანეთის დაზვერვის ცნობით, უახლოეს თვეებში მდინარე სივერსკი დონეცის გადაკვეთის ოპერაციები ომის მსვლელობის მნიშვნელოვანი განმსაზღვრელი ფაქტორი იქნება.