ერთ-ერთმა ყველაზე ცნობილმა ბრიტანულმა გამოცემა The Guardian-მა აქამდე გამოსულ ფილმებს შორის 2022 წლის საუკეთესოთა სია გამოაქვეყნა და მათ შორის ქართველი რეჟისორის სალომე ჯაშის სრულმეტრაჟიანი დოკუმენტური ფილმი მოთვინიერება მოხვდა.

"ეს დოკუმენტური ფილმი მოგვითხრობს მეტად უჩვეულო, მაგრამ თან მამხილებელ ამბავს ქართველი მილიარდერი ბიძინა ივანიშვილის გეგმაზე, რომ ქვეყნის მასშტაბით ასობით ხე ამოთხაროს და თავის კერძო ბაღში გადარგოს", — აღნიშნულია სტატიაში ფილმის შესახებ.

იქვე მითითებულია სალომე ჯაშის ამ გახმაურებულ ფილმზე ცნობილი ბრიტანელი მწერლისა და კინოკრიტიკოსის პიტერ ბრედშოუს რეცენზია, რომელშიც ვკითხულობთ:

"იმ შორეული სოფლებიდან მოშორებით, საიდანაც ხეები მიიტაცეს, რასაც ზოგჯერ სიბნელეშიც კი აკეთებდნენ (ალბათ, იმათი მასობრივი პროტესტის ასარიდებლად, ვინც ხეები გაყიდეს და შემდეგ სინდისმა შეაწუხათ), ვხედავთ ოლიგარქის მიერ გაშენებულ უცნაურ კერძო ბაღს თავისი ხეებითა და გაკრეჭილი გაზონებით. რეალურად, მთელი ქვეყანა ბაღია, რომლის დაპყრობაც მან სცადა კერძო საკუთრების მოთვინიერებულ სტერილურობამდე დაყვანით".

აღსანიშნავია, რომ The Guardian-ის ამავე სიაში დასახელდა ისეთი გავლენიანი კინორეჟისორების ცნობილი ფილმები, როგორებიცაა პედრო ალმოდოვარის პარალელური დედები, პოლ თომას ანდერსონის ძირტკბილას პიცა და გილერმო დელ ტოროს კოშმარების ხეივანი.

შეგახსენებთ, რომ რეჟისორმა სალომე ჯაშმა 28 აპრილს გაავრცელა განცხადება, რომ კინოაკადემიამ მისი დოკუმენტური ფილმის მოთვინიერების სეანსები გააუქმა. ჯაშის ინფორმაციით, კინოაკადემიის დირექტორმა სეანსების გაუქმების მიზეზად განმარტა, რომ მათთვის მიუღებელია აჩვენონ "ნაწარმოები, რომელიც აზრთა სხვაობას იწვევს და საზოგადოებას პოლიტიკური ნიშნით ყოფს".

კინოაკადემიის ხელმძღვანელმა, მინდია ესაძემ რადიო თავისუფლებასთან თქვა, რომ კინოჩვენებების გაუქმების მიზეზი ფილმის შინაარსია.

საქართველოს კინოაკადემიის ხსენებული გადაწყვეტილების შემდეგ, მოთვინიერების ჩვენება ალტერნატიულ სივრცეებში გაგრძელდა.

მოგვიანებით გავრცელდა ინფორმაცია, რომ სალომე ჯაში ევროპული კინოაკადემიის წევრი გახდა.

სალომე ჯაშის დოკუმენტური ფილმის მსოფლიო პრემიერა 31 იანვარს სანდენსის საერთაშორისო კინოფესტივალზე შედგა. ასევე, სურათი ბერლინის საერთაშორისო კინოფესტივალის სექციაში ფორუმი 17 ფილმს შორის მოხვდა. ფილმი ნომინირებული იყო ევროპის კინოაკადემიის ჯილდოზე. ფილმი მოთვინიერება კიევის ყოველწლიური კინოფესტივალის International Human Rights Documentary Film Festival Docudays UA საერთაშორისო სექციის DOCU/WORLD გამარჯვებული გახდა.