დღეს, 1 ივნისს, საკონსტიტუციო სასამართლოს შესახებ კანონზე ადამიანის უფლებათა დაცვის კომიტეტზე იმსჯელებენ, რომელსაც პრეზიდენტმა ვეტო მას შემდეგ დაადო, რაც ვენეციის კომისიისგან კანონთან დაკავშირებული კრიტიკული დასკვნა მიიღო.

საპარლამენტო უმრავლესობის განცხადებით, პრეზიდენტთან კონსულტაციების შედეგად მხარეები რიგ სადავო საკითხებზე შეჯერდნენ.

საპროცედურო საკითხთა კომიტეტის თავჯდომარის, გიორგი კახიანის განმარტებით, პრეზიდენტმა, ერთი მხრივ, დადებითად შეაფასა აღნიშნული კანონპროექტით გათვალისწინებული რიგი ცვლილებები. მეორე მხრივ კი, გარკვეულ საკითხებზე რიგი შენიშვნები ჰქონდა:

"ჩვენი მხრიდანაც გავითვალისწინეთ პრეზიდენტის გარკვეული პოზიციები. საბოლოო ჯამში, ყველაფერი ეს პრეზიდენტის მოტივირებულ შენიშვნებში აისახა. იქიდან გამომდინარე, რომ ყველაფერ ამას წინასწარი კონსულტაციების სახე ჰქონდა, მიმაჩნია, რომ პარლამენტი პრეზიდენტის შენიშვნებს გაითვალისწინებს".

უმრავლესობის წევრმა, ზვიად კვაჭანტირაძემ კი განაცხადა, რომ პრეზიდენტთან კონსულტაციების შედეგად მხარეებმა მოილაპარაკეს შემდეგზე:

"ერთი იყო კვორუმის საკითხი, სადაც დიფერენცირება თემატიკის მიხედვით მოხდა, რაც ჩვენც ძალიან გვაწყობს. ასევე იყო მოსამართლეების 3 თვით ადრე რომ არ უნდა მიეღოთ ახალი საქმის განხილვაში მონაწილეობა და აქაც მოხდა შეთანხმება".

რაც შეეხება იურიდიულ საკითხთა კომიტეტის თავჯდომარეს, ვახტანგ ხმალაძეს, მან იმედი გამოთქვა, რომ იმის გათვალისწინებით, რომ პრეზიდენტი, პრემიერმინისტრი და პარლამენტის თავჯდომარე რიგ საკითხებზე შეთანხმდნენ, პრეზიდენტის შენიშვნებს საპარლამენტო უმრავლესობაც გაითვალისწინებს.

საკონსტიტუციო სასამართლოს შესახებ კანონში ცვლილებები პარლამენტმა 14 მაისს მიიღო. შემდეგ ის პრეზიდენტს, პრეზიდენტმა კი დასკვნისთვის ვენეციის კომისიას გადაუგზავნა. ვენეციის კომისიის კრიტიკული დასკვნის მიღების შემდეგ გუშინ, 31 მაისს, გიორგი მარგველაშვილმა აღნიშნულ კანონს ვეტო დაადო.