მას შემდეგ, რაც საკონსტიტუციო სასამართლოს შესახებ კანონს პრეზიდენტმა ვეტო დაადო, საპარლამენტო უმრავლესობის წევრთა ნაწილი ამბობს, რომ პრეზიდენტის შენიშვნებს ეთანხმება.

ცნობილია, რომ პრეზიდენტის მიერ კანონზე ვეტოს დადებას წინ მარგველაშვილს, კვირიკაშვილსა და პარლამენტის დეპუტატებს შორის შეხვედრა უძღოდა. უმრავლესობის წევრი, ეკა ბესელია განმარტავს, რომ აღნიშნული შეხვედრის შედეგად მხარეები ძირითად საკითხებზე შეჯერდნენ:

"კარგია, რომ ძირითად საკითხებზე შევჯერდით. დოკუმენტზე ვიმუშავებთ იმ წინასწარი შეჯერებული პოზიციებით, რითაც დაუახლოვდა ჩვენი არგუმენტები დაუახლოვდა ერთმანეთს იმ სამ საკითხზე, რომელზეც პრეზიდენტი აგზავნის შენიშვნებს. სხვა საკითხებზე პოზიციები ემთხვევა".

საკონსტიტუციო სასამართლოს შესახებ კანონში ცვლილებები პარლამენტმა 14 მაისს მიიღო. დოკუმენტი ხელმოსაწერად პრეზიდენტს, პრეზიდენტმა განსახილველად კი ვენეციის კომისიას გადაუგზავნა. მას შემდეგ, რაც კომისიამ თავისი დასკვნა უკან გამომგზავნა, პრეზიდენტმა, დღეს, 31 მაისს, აღნიშნულ კანონს ვეტო დაადო.

პალრამენტს 15 დღიანი ვადა აქვს იმისთვის, რომ ჩამოაყალიბოს თავისი აზრი, იზიარებს თუ არა პრეზიდენტის ვეტოს.