უკრაინის პრეზიდენტის ადმინისტრაციის უფროსის მრჩეველი ალექსეი არესტოვიჩი აცხადებს, რომ უკრაინის მხრიდან დათმობები არ იქნება. მისი თქმით, ევროკავშირის ქვეყნებთან რუსეთის დიალოგი უკრაინის, აშშ-სა და დიდი ბრიტანეთის პოზიციას არ შეცვლის.

არესტოვიჩი ამბობს, რომ უკრაინელი და დასავლელი ანალიტიკოსების გათვლებით, თვე-ნახევარ-ორ თვეში უკრაინის არმია თავისი საბრძოლო შესაძლებლობების პიკზე იქნება და წარმატებულ შეტევას შეძლებს, რუსეთს კი ამის ეშინია და ცდილობს უკრაინისთვის დასავლური იარაღის მიწოდების პროცესი მაქსიმალურად შეაჩეროს.

"რუსეთის ფედერაცია ასევე მუშაობს პრეზიდენტისა და მთავრობის მიმართ მოქალაქეების ნდობის გაყოფაზე, თითქოს ჩვენი მხრიდან მიდის მოლაპარაკებები მიუღებელი დათმობებით. მინდა დაგამშვიდოთ. იმ შემთხვევაშიც კი, თუ რუსეთის ფედერაცია აწარმოებს მსგავს დიალოგს ევროკავშირის ზოგიერთ ქვეყანასთან, ეს არანაირად არ შეცვლის უკრაინის ხელმძღვანელობის პოზიციას, ასევე ჩვენი მოკავშირეების, აშშ-სა და დიდი ბრიტანეთისას. შემდეგი "მინსკი" და დათმობები უკრაინის მხრიდან არ იქნება", — ამბობს ის.

იმისთვის, რომ არ გამოგრჩეთ უკრაინაში მიმდინარე პროცესებთან დაკავშირებული სიახლეები, შემოგვიერთდით ჯგუფში — რა ხდება უკრაინაში.