აზოვის ბატალიონის განცხადებით, ოკუპანტები აზოვსტალის ქარხანაზე შეტევას აგრძელებენ. მათი თქმით, ისინი მძიმე არტილერიას, ტანკებსა და საჰაერო ბომბებს იყენებენ, თუმცა მცველები მათ იერიშს იგერიებენ.

"ოკუპანტები უკრაინაში შეჭრის 80-ე დღე მარიუპოლის მცველებზე საჰაერო ბომბებით იერიშის მიტანას მძიმე არტილერიისა და ტანკების გამოყენებით აგრძელებენ. უკრაინის პოზიციებზე შტურმის მცდელობისთვის დიდი რაოდენობით ქვეითებს იყენებენ. უკიდურესად კრიტიკული სიტუაციის მიუხედავად, მცველები ზეადამიანური ძალისხმევით მათი პოზიციების გარღვევის მცდელობებსა იგერიებენ და მტრის ჯარს აკავებენ", — წერენ ისინი.

დღეს, 14 მაისს უკრაინის ვიცეპრემიერმა, ირინა ვერეშჩუკმა განაცხადა, რომ მოლაპარაკებები აზოვსტალიდან 60 ადამიანის გამოყვანაზე მიმდინარეობს. მანამდე, მან თქვა, რომ მოლაპარაკებები ძალიან რთულია, ამიტომ, მისი შედეგით ყველა კმაყოფილი ვერ იქნება.

20 აპრილს მარიუპოლის მცველებმა მსოფლიოს მოუწოდეს, აზოვსტალიდან გაიყვანონ მესამე ქვეყანაში ყველა, ვინც სამხედრო გარნიზონშია.

30 აპრილს კი მარიუპოლის მცველების მეთაურმა თურქეთის პრეზიდენტ რეჯეფ თაიფ ერდოღანს ალყაში მყოფი აზოვსტალიდან მებრძოლებისა და სამოქალაქო პირების გაყვანა სთხოვა.