საერთაშორისო გამჭვირვალობა — საქართველოს ინფორმაციით, სენაკის მერიის მიერ 2022 წლის მარტში გამოცხადებულ 5 ტენდერში ქალაქის მერის, ვახტანგ გადელიას ბიძის, დემურ გადელიას კომპანიამ, სს არქეოპოლისმა და ბიძაშვილის, იოსებ გადელიას კომპანიამ, შპს ინდიკომ უკონკურენტოდ გაიმარჯვეს. ორგანიზაცია წერს, რომ ვახტანგ გადელია ადრე თავადაც მუშაობდა არქეოპოლისში.

TI-ის შეფასებით, შესაძლებელია, სატენდერო პირობები კონკრეტულ მიმწოდებლებზე ყოფილიყო მორგებული. როგორც ირკვევა, კომპანიებმა გზის საფარის აღდგენისა და კორპუსების ეზოებში შიდა გზების რეაბილიტაციის, ასევე, მოედნის მოწყობის სამუშაოები უნდა შეასრულონ. ტენდერების ჯამური ღირებულება 2 614 550 ლარია.

როგორც TI წერს, აღნიშნულ მომსახურებათა შესყიდვა სენაკის მერიამ თავდაპირველად 2022 წლის იანვარში, მხოლოდ ორი ტენდერის მეშვეობით სცადა, რომლებშიც არქეოპოლისმა და ინდიკომ გაიმარჯვეს. მერიამ კომპანიებთან ხელშეკრულებები ვერ გააფორმა, რადგანაც ორივე შემთხვევაში ხელშეკრულების ღირებულება სენაკის მუნიციპალიტეტის ბიუჯეტის გადასახდელების 5%-ს აღემატებოდა და ამ ღირებულების ხელშეკრულების გაფორმებას საკრებულოს თანხმობა სჭირდება. სატენდერო კომისიამ ორივე ტენდერი შეწყვიტა, რადგან სენაკში საკრებულოს პარტიათა შორის არსებული დაპირისპირების გამო ამ დრომდე არ დაუწყია ფუნციონირება. როგორც ორგანიზაციის ანგარიშში წერია, კომპანიებს ამ ტენდერებში კონკურენტი არ ჰყოლიათ.

საერთაშორისო გამჭვირავლობას ინფორმაციით, სენაკის მერიამ 25 და 29 მარტს ორი შეწყვეტილი ტენდერის ნაცვლად ექვსი ახალი ტენდერი გამოაცხადა. ტენდერი, რომელშიც სს არქეოპოლისი გამოვლინდა გამარჯვებულად, ამჯერად 3 შესყიდვად დაიყო, ასევე 3 შესყიდვად დაიყო შპს ინდიკოს მიერ მოგებული ტენდერიც. ორგანიზაციის თქმით, ამ გზით მერიამ შეამცირა მომსახურებათა ღირებულება, რითაც თავიდან აირიდა ხელშეკრულების გაფორმებაზე საკრებულოს თანხმობის საჭიროება.

"როგორც წინა ორ შემთხვევაში, ასევე ახალ ტენდერებზე სენაკის მერიამ ფინანსური გამოცდილების საკმაოდ მაღალი მოთხოვნები წამოაყენა, რამაც, ჩვენი შეფასებით, მნიშვნელოვნად შეზღუდა ბაზარზე მოქმედი სხვა ალტერნატიული მიმწოდებლები და კონკურენცია, რადგანაც ამ მოთხოვნებს სენაკსა და რეგიონში მოქმედი კომპანიების უმეტესობა ვერ აკმაყოფილებს", — წერია TI-ის ანგარიშში.

ორგანიზაცია წერს, რომ სს არქეოპოლისთან დაკავშირებულია სენაკის მერიის ადმინისტრაციული სამსახურის უფროსი, ნანა ზარანდიაც — იგი 2019 წლის 8 თებერვლიდან 2020 წლის 12 ივნისამდე არქეოპოლისის დირექტორი იყო. TI-ის ინფორმაციით, ნანა ზარანდია ამავე დროს სენაკის მერიის სატენდერო კომისიის თავმჯდომარის მოადგილეცაა, როგორც წინა, შეწყვეტილი ორი შესყიდვის, ასევე ახალი ექვსივე შესყიდვის დოკუმენტებში ხელს აწერს, რომ არ აქვს ინტერესთა კონფლიქტი არც სს არქეოპოლისთან და არც შპს ინდიკოსთან.

ამასთან, TI-ის ანგარიშის მიხედვით, ვახტანგ გადელიამ ხუთივე შესყიდვაზე აღნიშნა, რომ გააჩნია ინტერესთა კონფლიქტი როგორც შპს ინდიკოსთან, ასევე სს არქეოპოლისთან და ხელშეკრულებათა გაფორმებაზე უფლებამოსილება მერის პირველი მოადგილისთვის აქვს დელეგირებული. მიუხედავად ამისა, ორგანიზაცია წერს, რომ ზემოთ მოყვანილი გარემოებები აჩენს ეჭვებს პროცესის გამჭვირვალობასთან დაკავშირებით.

საერთაშორისო გამჭვირვალობა — საქართველო სახელმწიფო უსაფრთხოების სამსახურის ანტიკორუფციულ სააგენტოს მოუწოდებს, შეისწავლოს სენაკის მერიის ტენდერებში სს არქეოპოლისისა და შპს ინდიკოს მონაწილეობის პროცესი და დაადგინოს, შეიცავს თუ არა კორუფციის შესაძლო ნიშნებს.