საქართველოს ახალგაზრდა იურისტთა ასოციაციის ცნობით, მათ სტრასბურგის სასამართლოს მოთხოვნით ქართველი სამხედრო პირების, მათ შორის, გიორგი ანწუხელიძის, საჩივრებზე, სამართლიანი დაკმაყოფილების საკითხზე, რუსეთის ფედერაციის წინააღმდეგ წერილობითი პოზიცია წარადგინეს.

საიას განმარტებით, პოზიციაში მითითებულია, რომ რუსეთის შეიარაღებული ძალების და მათ კონტროლქვეშ მოქმედი სამხრეთ ოსეთის ძალების ქმედებებით მატერიალური და მორალური ზიანი მიადგათ მომჩივან პირებს და იმ ჯარისკაცების ოჯახის წევრებს, რომლებსაც განსაკუთრებული სისასტიკით, განზრახ მოუსპეს სიცოცხლე. საია წერს, რომ რუსეთი ფედერაციისგან მოთხოვნილია როგორც მატერიალური, ასევე მორალური ზიანის ანაზღაურება.

"საიამ სტრასბურგის სასამართლოს მოთხოვნით ქართველი სამხედრო პირების, მათ შორის, გიორგი ანწუხელიძის, საჩივრებზე რუსეთის ფედერაციის წინააღმდეგ წერილობითი პოზიცია წარადგინა სამართლიანი დაკმაყოფილების საკითხზე.

პოზიციაში საია მიუთითებს, რუსეთის შეიარაღებული ძალების და მათ კონტროლქვეშ მოქმედი სამხრეთ ოსეთის ძალების ქმედებებით მატერიალური და მორალური ზიანი მიადგათ მომჩივან პირებს, რომლებიც არიან ქართველი სამხედრო მოსამსახურეები და იმ ჯარისკაცების ოჯახის წევრები, რომლებსაც განსაკუთრებული სისასტიკით განზრახ მოუსპეს სიცოცხლე შეიარაღებული საერთაშორისო კონფლიქტისას.

მოთხოვნილია როგორც მატერიალური, ასევე მორალური ზიანის ანაზღაურება რუსეთის ფედერაციის მხრიდან.

საიამ სტრასბურგის სასამართლოს 2008 წლის აგვისტოს ომის შედეგად დაზარალებულთათვის მართლმსაჯულების უზრუნველსაყოფად კომპენსაციის საერთაშორისო მექანიზმის შექმნის თხოვნითაც მიმართა წარსულში. ამავე საკითხზე, 2024 წელს ასევე მიმართა საგარეო საქმეთა სამინისტროს.

საია 2008 წლის აგვისტოს რუსეთ-საქართველოს ომის პერიოდში მომხდარ დარღვევებთან დაკავშირებით სტრასბურგის სასამართლოში 400-მდე პირის ინტერესებს უკვე 17 წელია აქტიურად იცავს და მომავალშიც განაგრძობს მათ დახმარებას", — წერია საიას მიერ გავრცელებულ ინფორმაციაში.