მოკლული მასწავლებლის, გიგა ავალიანის საქმეზე დაკავებულ ორ არასრულწლოვანს პროკურატურამ ბრალი დაუმძიმა. დ.ჩ. და ა.ნ. თავდაპირველად დანაშაულის შეუტყობინებლობის ბრალდებით დააკავეს. ამჟამად მათ პროკურატურა ჯგუფურად განსაკუთრებული სისასტიკით ჯანმრთელობის განზრახ მძიმე დაზიანებას ედავება. დ.ჩ. და ა.ნ. აღნიშნულ საქმეზე ჯანმრთელობის განზრახ მძიმე დაზიანების მუხლით დაკავებული არასრულწლოვანი ა.გ-ს მეგობრები არიან.

17 წლის დ.ჩ. სისხლის სამართლის კოდექსის 117-ე მუხლით 9-დან 13 წლამდე პატიმრობა ემუქრება.

დ.ჩ.-ს დედამ, სოფო ძნელაძემ ტვ პირველთან საუბრისას განაცხადა, რომ "ბრალში აბსურდი წერია" და მისი შვილი შემთხვევის დროს თემქაზე არ იმყოფებოდა. დაკავებულის დედამ პროკურატურის წინ შიმშილობის დაწყება დააანონსა.

"ბრალში წერია აბსურდი, ბრალში წერია სამართლებრივი ველიდან გასული ბრალდებები. 29 სექტემბერს, ჩემი შვილი იმყოფებოდა თემქაზე იმ ბავშვებთან, ჩვენ არ დაგვიმალავს გამოძიებისთვის, როგორც კი დაგვიბარეს ვთქვით, რომ ერთი საათიც არ დაყოვნებულა თემქაზე. 1-ელ ოქტომბერს, როდესაც შემთხვევა მოხდა დ.ჩ. თემქაზე ფიზიკურად არ იმყოფებოდა და გვედავებიან იმას, რომ ჩემმა შვილმა ამათთან ერთად მოამზადა დანაშაული — ეს არის აბსურდული ბრალი, ამას ვერ ვეთანხმებით.

ხვალ დავიწყებ შიმშილობას, მოვკვდები პროკურატურასთან და შევეწირები ჩემი შვილის უდანაშაულობას," — განაცხადა ბრალდებულის დედამ.

მოგვიანებით, დ.ჩ.-ს დედის კომენტარს, გიგა ავალიანის დედა, ეკა კუპატაძე გამოეხმაურა. კუპატაძეს განცხადებით, ბრალდებულის დედა იტყუება — მას საქმის მასალებზე ჰქონდა წვდომა, სადაც კუპატაძის მტკიცებით წერია, რომ მკვლელობის დღეს დ.ჩ. ა.გ.-თან ერთად იმყოფებოდა.

"იტყუება იმ არასრულწლოვანის დედა. ის ამბობს, რომ 117-ე მუხლის მესამე, მას ექნება 18-ით 117-ს მესამე, რაც იმას ნიშნავს, რომ [მისი შვილი] მომზადებაში იღებდა მონაწილეობას და არა აღსრულებაში. ათივე ტომი ვნახეო. ათივე ტომი თუ ნახა რას ათვალიერებდა, ჩემი გიგას გვამით ტკბებოდა? არ ვიცი რამდენ ხანს ვიყავი თემქაზე. მკვლელ ა.გ-ს უწერია სამი საათი "ვუსეტკავეო", აი რისთვის წამოჰყვა მეგობარს სამი საათი საბირჟაოდ? ახალი ბირჟა ნახეს?

ქუჩაში ვიყავითო და ქუჩაში არ იყვნენ. აგერ იყვნენ ჩემი კორპუსის წინ, საიდანაც მერე ქვა აიღო მკვლელმა იმ გრძელ სკამზე. გადაიღეს ვიდეო, ეს ვიდეო ჩაუგდეს ა.ნ.-ს.
მეოთხე ტომი ნახე, კარგად დაათვალიერე. იქ წერია, რომ სამივე ბიჭი ერთად ა.გ.-ც, გ.რ.-ც და დ.ჩ.-ც მიდის გ.რ.-ს მამასთან, გურამ რიკაძესთან. გურამ რიკაძე ეს არის წარსულში ნასამართლევი. ჩამოვიდა სპეციალურად 8 ოქტომბერს საქართველოში ამისთვის, 2019 წლიდან წასულია და ის არიგებს, როგორ უნდა მოიქცნენ, სად რა უნდა თქვან. პროკურატურამ აღიარა წინა ბრალის აბსურდულობა, რასაც მე საჯაროდ ვყვიროდი," — განაცხადა კუპატაძემ.

1-ელ ოქტომბერს, თემქის დასახლებაში, ერთ-ერთი საცხოვრებელი კორპუსის მიმდებარე ტერიტორიაზე, 28 წლის მათემატიკის მასწავლებელსა და ექიმს, გიგა ავალიანს თავს დაესხნენ. თავდასხმისას მიღებული მძიმე თავის ტრავმით ავალიანი საავადმყოფოში მოათავსეს, სამ კვირაში კი, 24 ოქტომბერს გარდაიცვალა.

2025 წლის, 22 დეკემბერს მასწავლებელ გიგა ავალიანის მკვლელობის გამოძიების მოთხოვნით, პროკურატურასთან აქცია გაიმართა. პროკურატურის წარმომადგენლები გარდაცვლილის ოჯახის წევრებს შეხვდნენ — ოჯახმა უწყებას საქმის სათანადოდ გამოსაძიებლად ვადად დამატებით 2 კვირა მისცა.

გარდაცვლილის ოჯახის ადვოკატმა, ზაზა ხატიაშვილმა განაცხადა, რომ მანამ სანამ ავალიანი გარდაიცვლებოდა პროკურატურა გამოძიებას ჯგუფური ძალადობის ბრალდებით აპირებდა. დაზარალებულის გარდაცვალების შემდეგ, პროკურატურამ ეს პოზიცია შეცვალა და არასრულწლოვან ბრალდებულებს ბრალი ჯანმრთელობის განზრახ მძიმე დაზიანებისთვის და დანაშაულის შეუტყობინებლობისთვის წარუდგინა. ადვოკატმა ასევე ისაუბრა, რომ პროკურატურა ოჯახს საქმის მასალებს უმალავდა.

გარდაცვლილის დედამ, ეკა კუპატაძემ 17 იანვარს შიმშილობის დაწყება დააანონსა, მისი მთავარი მოთხოვნა გენერალური პროკურორის თანამდებობიდან გადაყენება იყო. 14 იანვარს, კუპატაძემ სოციალურ ქსელში დაწერა, რომ დაანონსებული აქცია დროებით გადაიდო და ოჯახს საქმის მასალები გადაეცა.