გიგა ავალიანის მკვლელობის საქმეზე დაკავებულმა არასრულწლოვანმა, დ.ჩ.-მ შიმშილობა დაიწყო. ინფორმაცია ბრალდებულის დედამ, სოფო ძნელაძემ ტვ პირველთან საუბრისას დაადასტურა. ციხიდან გამოგზავნილ წერილში დაკავებული არასრულწლოვანი წერს, რომ თავს უდანაშაულოდ მიიჩნევს და ხსნის, რომ პროტესტის ამ უკიდურესს ფორმას პროკურატურის უსამართლო პოზიციის გამო მიმართა.

"ქალბატონო პროკურორო, მოგმართავთ გლდანის ციხიდან, თქვენი და თქვენი უფროსების მიერ თავისუფლება წართმეული არასრულწლოვანი, მოგმართავთ უდანაშაულო ბავშვი, რომელიც მზად ხართ შესწიროთ ოღონდ სისტემას რამე ჩრდილი არ მიადგეს და არ აქვს მნიშვნელობა მართალი ვარ თუ არა, თქვენთვის მთავარია არ გყავდეთ მომჩივანი.

დარწმუნებული ვარ, თქვენ და თქვენმა უფროსებმაც იციან, რომ არ მომიმზადებია დანაშაული, იციან, რომ საერთოდ არ ვყოფილვარ იმ საშინელ დღეს იმ ადგილას, სადაც დატრიალდა ტრაგედია, მაგრამ მიწევს ციხის კედლებში ყოფნა.

თქვენ და თქვენს უფროსებს შვილები გყავთ? გთხოვთ, წამით წარმოიდგინეთ თქვენი შვილი, რომელსაც დანაშაული არ ჩაუდენია, მაგრამ მისი ციხეში გაშვებით გიკლავენ მას. ხომ საშინელებაა!

იცოდეთ, მეც გულით მტკივა გიგას დედის ტკივილი, მაგრამ უფალთან, საკუთარ სინდისთან მართალი ვარ და ვიცი რომ არ მიმიძღვის ბრალი მის სიკვდილში. ამიტომაც, მეოთხე დღეა დედაჩემი შიმშილობს ჩემ გამო, ბევრი ვიფიქრე, არ მინდოდა დედისთვის გულის ტკენა, დაე მან მაპატიოს, არ შემიძლია ვიჯდე და ვუყურო უსამართლობას.

დღეიდან ვიწყებ შიმშილობას ბოლო ამოსუნთქვამდე და იცით რატომ გწერთ ამას? — მირჩევნია მოვკვდე, ვიდრე თქვენგან ღირსება შელახული ვიყო მეც და ჩემი ოჯახიც. იმედია ჩემი სიკვდილი დაამშვიდებს უსამართლო ადამიანებს, იქნებით ბედნიერი, მთავარი ხომ საკუთარი სკამია," — წერს ბრალდებული.

მე-4 დღეა 17 წლის დ.ჩ.-ს დედა, სოფო ძნელაძე პროკურატურასთან შიმშილობს. 17 იანვარს, პროკურატურასთან გამართულ აქციაზე სოფო ძნელაძემ განაცხადა, რომ მის შვილს იმ დანაშაულზე ედავებიან, რის დროსაც ის "შემთხვევის ადგილზე არც კი ყოფილა" და მისი შვილისთვის ბრალის შეცვლას "უსამართლობის ზენიტი" უწოდა.

15 იანვარს ცნობილი გახდა, რომ გიგა ავალიანის საქმეზე დაკავებულ ორ არასრულწლოვანს პროკურატურამ ბრალი დაუმძიმა. დ.ჩ. და ა.ნ. თავდაპირველად დანაშაულის შეუტყობინებლობის ბრალდებით დააკავეს. ამჟამად მათ პროკურატურა ჯგუფურად განსაკუთრებული სისასტიკით ჯანმრთელობის განზრახ მძიმე დაზიანებას ედავება. დ.ჩ. და ა.ნ. აღნიშნულ საქმეზე ჯანმრთელობის განზრახ მძიმე დაზიანების მუხლით დაკავებული არასრულწლოვანი ა.გ-ს მეგობრები არიან.

გიგა ავალიანის ოჯახის ადვოკატის, დარეჯან სულაშვილის განმარტებით, 29 სექტემბერს, როდესაც არასრულწლოვანები თავდასხმის მიზნით გიგა ავალიანს მოსამზადებელ ცენტრთან უთვალთვალებდნენ — დ.ჩ.-ც მის მეგობრებთან ერთად იმყოფებოდა.

ავალიანის ოჯახის ადვოკატი ამტკიცებს, რომ საქმეში არსებული ჩვენებები და არასრულწლოვანთა შორის მიმოწერები ამტკიცებს იმ ფაქტს, რომ 29 სექტემბერს, დ.ჩ.-მ იცოდა რატომ ელოდებოდნენ გიგა ავალიანს მოსამზადებელ ცენტრთან.

1-ელ ოქტომბერს, თემქის დასახლებაში, ერთ-ერთი საცხოვრებელი კორპუსის მიმდებარე ტერიტორიაზე, 28 წლის მათემატიკის მასწავლებელსა და ექიმს, გიგა ავალიანს თავს დაესხნენ. თავდასხმისას მიღებული მძიმე თავის ტრავმით ავალიანი საავადმყოფოში მოათავსეს, სამ კვირაში კი, 24 ოქტომბერს გარდაიცვალა.