სოციალური სამართლიანობის ცენტრის ხელმძღვანელი თამთა მიქელაძე ჭიათურელი მაღაროელებისთვის გამოტანილ განაჩენს სოციალურ ქსელში გამოეხმაურა. მისი თქმით, მსჯავრდადებული პირების დიდი ნაწილის მიმართ ბრალდება არც მტკიცდება და პირდაპირი მტკიცებულებები სასამართლოს პრაქტიკულად არ აქვს. მისივე განმარტებით, "ჭიათურელების სასტიკი დასჯის უკან დგას სახელმწიფოს დიდი გზავნილი და მუქარა."

"ჭიათურელ მაღაროელებს უმძიმესი განაჩენი გამოუტანა სასამართლომ.

ადამიანებს, ვინც ამდენი წელია იბრძვიან ღირსეული გარემოსთვის და ქალაქის გადარჩენისთვის, კომპანიის მენეჯმენტის წარმომადგენელზე ჯგუფურ ძალადობას ედავებიან. კომპანიის მიერ შრომითი უსაფრთხოების დარღვევა და ასობით ადამიანის სიკვდილი და დასახიჩრება, სოფლების განადგურება და აყრა, გარემოს დაბინძურება, ათასობით მაღაროელის და მშრომელის უკანონო მასობრივი გათავისუფლება და საბაზისო შემოსავლის გარეშე დატოვება არ არის ძალადობა, მაგრამ ღირსებააყრილი კაცების კონფლიქტი მენეჯმენტთან, რომელიც თავად ამ ადამიანის მხრიდან შეურაცხყოფით დაიწყო, სასტიკად უნდა დაისაჯოს. ეს მაშინ, როცა ახლა უკვე მსჯავრდადებული პირების დიდი ნაწილის მიმართ ეს არც მტკიცდება და პირდაპირი მტკიცებულებები სასამართლოს პრაქტიკულად არ აქვს.

აი ეს არის ანტისოციალური სახელმწიფო, სადაც სრული იმუნიტეტი აქვთ რეჟიმის ეკონომიკურ და პოლიტიკურ რგოლებს, უბრალო ადამიანების ღირსების, უსაფრთხოების და მომავლის დაცვა კი არავის საქმე არის.

სასამართლო გადაწყვეტილების გამოცხადების კადრებს ვუყურებ და ნამდვილი გლოვა იგრძნობა ამ ფოტოებში. ეს ახალგაზრდა მშრომელი კაცები იმ ბრძოლისთვის ისჯებიან, რომელიც უკვე 1 წელია უწყვეტად მიმდინარეობს ჭიათურაში. ამ ადამიანების უკან შვილები, ცოლები, მშობლები, ნათესავები და თანამებრძოლები დგანან და რეალურად ეს მთელი ქალაქის გლოვაა.

ჩვენი ადვოკატები მუხლჩაუხრელად შრომობდნენ მაღაროელებს დასაცავად, მაგრამ როცა მართლმსაჯულება გაუქმებულია, რისი გაკეთება შეუძლიათ მებრძოლ ადვოკატებს?! ცხადია, ამ გადაწყვეტილებას გავასაჩივრებთ და ბოლომდე დავიცავთ მაღაროელების ინტერესებს. მაგრამ ოჯახებისთვის, შვილებისთვის მიყენებულ ამდენ ტკივილს და ტრავმას რა აღადგენს?!

ჭიათურელების სასტიკი დასჯის უკან დგას სახელმწიფოს დიდი გზავნილი და მუქარა, რომ ეკონომიკურ ძალაუფლებასთან დაპირისპირება ძვირი დაუჯდება ყველას. ოლიგარქიულ სისტემას, რომელიც აღმოსავლეთის ბაზრებიდან ახალი კომპანიების აგრესიულ მოზიდვაზეა გადასული და მათ მოსაზიდად უკონტროლო და ღია პირობებს ქმნის, საკუთარი თავის ეკონომიკური გადარჩენისთვის, უფრო მეტად კი საკუთარი გამდიდრებისთვის, ამ ტიპის იმუნიტეტი და მოქალაქეების დაუძლურება ყველაზე მეტად სჭირდება", — დაწერა თამთა მიქელაძემ.

ცნობისთვის, ქუთაისის საქალაქო სასამართლომ ჯგუფური ძალადობის ბრალდებით დაკავებული ოთხივე ჭიათურელი მაღაროელი დამნაშავედ ცნო და პატიმრობა მიუსაჯა. გადაწყვეტილება მოსამართლე თამარ მაზნიაშვილმა მიიღო.

ჯგუფური ძალადობის ორგანიზებით და მასში მონაწილეობისთვის დაკავებულ გიორგი ნეფარიძეს და მერაბ სარალიძეს 6 წლითა და 3 თვით პატიმრობა მიესაჯათ.

ჯგუფურ ძალადობაში მონაწილეობის ბრალდებით დაკავებულ არჩილ ჭუმბურიძეს და თენგიზ გველესიანს 4 წლითა და 3 თვით თავისუფლების აღკვეთა მიესაჯათ.