სახელმწიფო უსაფრთხოების სამსახურმა რუსულ სამთავრობო ენერგეტიკულ კომპანია "გაზპრომთან" დაკავშირებული კონტრაქტის დეტალების გასაჯაროების გამო გამოძიება საბოტაჟის და კომპიუტერულ სისტემაში უნებართვო შეღწევის ფაქტებზე დაიწყო.

უწყების ცნობით, "გამოძიების დაწყების საფუძველი საქართველოს მთავრობის ადმინისტრაციიდან შემოსული ინფორმაცია გახდა იმის შესახებ, რომ ადმინისტრაციის ვებგვერდზე განხორციელდა სავარაუდო კიბერთავდასხმა და გარკვეული მანიპულაციები, რაც მიზნად ისახავდა არასწორი ინფორმაციის საჯარო სივრცეში გავრცელების გზით საქართველოს სახელმწიფო ინტერესების დაზიანებას, მათ შორის ქვეყნისთვის დამაზიანებელი პოლიტიკური და ეკონომიკური შედეგების დადგომას.

სავარაუდო დანაშაულებრივი ქმედების შემდეგ სხვადასხვა მედიასაშუალებასა და სოციალურ ქსელში დაიწყო საკითხის გაშუქება. სახელმწიფო უსაფრთხოების სამსახურის მხრიდან მოხდა მყისიერი რეაგირება - სახელმწიფო ინტერესების დაზიანების აღმოფხვრის მიზნით, პრევენციულად, მედიის წარმომადგენლებს, ასევე ცალკეულ პირებს, მიეცათ რეკომენდაცია, რომ ინფორმაციის გავრცელებისგან თავი შეეკავებინათ.

გამოძიება საქართველოს სისხლის სამართლის კოდექსის 318-ე და 284-ე მუხლებით მიმდინარეობს", — წერია უწყების მიერ გავრცელებულ ინფორმაციაში.

ცნობისთვის, ოცნების ხელისუფლების მთავრობის ადმინისტრაციის ვებგვერდზე გამოქვეყნდა ოცნების პრემიერმინისტრის, ირაკლი კობახიძის 2025 წლის 25 დეკემბრის N2212 განკარგულება, რომელიც საქართველოს მიერ Gazprom-ისგან შესასყიდ ბუნებრივი აირის ღირებულებას შეეხებოდა. აღნიშნულ განკარგულებასთან ერთად გასაჯაროებული იყო დოკუმენტის დანართიც, რომელიც, განკარგულების თანახმად, კომერციულ საიდუმლოებას წარმოადგენდა. მას შემდეგ, რაც მედიაში გავრცელდა ინფორმაცია, კომერციული საიდუმლოების შემცველი დოკუმენტის გასაჯაროების შესახებ, აღნიშნული დოკუმენტი ვებგვერდიდან აიღეს.

bm.ge-ს ცნობით, საქართველო რუსულ ბუნებრივ აირში 1000 კუბურ მეტრში 185 დოლარს იხდიდა. ამის შესახებ BMG-იმ 2024 წელსაც დაწერა, რაც 2023 წელს რუსეთიდან შესყიდული ბუნებრივი აირის მოცულობის 596 მილიონი კუბური მეტრის შესყიდვის ღირებულებაზე ($110 მლნ) გაყოფით იყო მიღებული. თუმცა უშუალოდ მთავრობის მხრიდან აღნიშნული ინფორმაცია არ გასაჯაროებულა. 2024 წელს კი საქართველომ რუსეთიდან გაზის იმპორტი 788 მილიონ კუბურ მეტრამდე გაზარდა, შესყიდული გაზის ღირებულება კი 145.7 მილიონ დოლარს შეადგენდა, რაც 1000 კუბურ მეტრზე ასევე 185 დოლარს შეადგენდა.

ჯერჯერობით 2025 წლის ბუნებრივი აირის 12 თვის სტატისტიკა ცნობილი არაა, თუმცა 11 თვის მდგომარეობით საქართველომ რუსეთიდან 123 მილიონი დოლარის ღირებულების ბუნებრივი აირი შეისყიდა.

"გაზპრომის" მონაცემებით, ბოლო ერთი წლის განმავლობაში რუსეთიდან საქართველოში გაზის მიწოდება 40.4%-ით გაიზარდა. პარალელურად, რუსეთმა გაზის ექსპორტი გაზარდა ცენტრალური აზიის ქვეყნებშიც — ყაზახეთში, უზბეკეთსა და ყირგიზეთში მიწოდება 22.2%-ით გაიზარდა.